Ray Online｜卓永興自爆18歲曾患乙型肝炎 在工聯會接受針灸治療成功入大學(卓永興Fb圖片)
政務司副司長卓永興日前出席慶國慶暨工聯會75周年文藝晚會，佢致辭嗰陣同大家分享一個小故事，45年前有個18歲青年人患上乙型肝炎，身體差到返唔到學，之後佢以工人子弟身份，去灣仔嘅工聯會工人醫療所接受幾個月針灸治療，並喺期間自修成功考上大學，之後開估話呢個就係佢本人啦，仲公開多謝工聯會，形容係同工聯會嘅一段緣。
之後嘅文藝表演，卓永興話被推去同歌手陳潔靈同埋工聯會會長吳秋北合唱一小段《千個太陽》。卓永興話從來未試過喺公開場合獻唱，但盛情難卻，只好厚住面皮為大家提供一啲娛樂同「談資」。
卓永興稱工聯會是勞工團體「一哥」
卓永興又讚揚工聯會歷史悠久，有超過250個各行各業嘅屬會同埋41萬名會員，絕對係本地勞工團體嘅「一哥」。佢亦充分表揚工聯會嘅愛國愛港情操，同埋喺最前線促進、維護勞工權益，例如成功爭取落實法定最低工資、侍產假等。
amFUN聖誕狂賞🎁狂送UNICO迷你遊戲機、主題公園門票、Panasonic鏡燈👉
