張宇人質疑官員計錯數，自稱生3個小朋友之後收入增10倍。(資料圖片／李睿哲攝)
政府新一份《施政報告》推出鼓勵生育措施，喺今日(8號)立法會大會上，自由黨議員邵家輝建議向基層家庭嘅每名新生嬰兒，每年發放4萬蚊直到5至6歲。不過政務司副司長卓永興就話涉及開支達到幾百億，唔會採納建議。同屬自由黨嘅張宇人就「幫拖」啦，質疑政府計錯數喎。
張宇人教卓永興計數
張宇人用自己做例子，話生完第3個小朋友之後，嗰5年收入多咗10倍。佢又提到生咗第3個小朋友，會發覺1年去兩次廸士尼要6張飛，唔係1張飛，再加上日常買尿片同出街食飯，可以促進經濟。張宇人教卓永興計數唔好只睇支出，話做生意好怕只係睇支出，唔睇收入嗰項，如果係咁乜生意都唔使做。
卓永興回應嗰陣就忍唔住笑，話唔係好充分掌握，但無論理由如何，似乎生育同收入冇必然關係喎，反問係咪生多啲就多啲收入，再納稅多啲咁樣？
amJetso送太興鮮臘腸 👇立即按此參加
