Ray Online︱鄧家彪倡政府辦公室加「BB相」鼓勵生育 「係小鄧家彪嚟嘅，唔好加班去陪老婆」
政府積極鼓勵生育，立法會議員都紛紛獻計，工聯會鄧家彪建議喺政府辦公室貼多啲「BB相」，令市民覺得小朋友好可愛，「Mini me嚟嘅、係一個小鄧家彪嚟嘅……睇到BB相好開心，唔好加班，返屋企陪老婆」。
立法會研究人口政策和措施小組委員會今日開會，鄧家彪回想大學時期流行「四仔主義」，即係畢業之後有「屋仔、老婆/老公仔、人仔、車仔」。不過鄧家彪分析而家部分後生仔就算有能力都未必生仔，離唔開唔敢生同唔想生。佢覺得需要由公務員開始營造社會氣氛，因為公務員有穩定嘅工作同收入，冇理由唔可以建立穩定嘅家庭。佢希望喺政府辦公室加「BB相」布置，令一啲本來唔想生仔嘅市民改變諗法。勞工及福利局副局長何啟明話鄧家彪嘅建議好創新，話佢自己都有貼BB相，但就唔係每個人都有「材料」，話會同公務員事務局睇睇可唔可以搵多啲「BB相」。
容海恩兩個女話唔想生仔
至於有兩個女嘅新民黨立法會議員容海恩就話，近排問兩個女「第時你會唔會諗住有小朋友呀？」點知兩個女話唔想，「因為唔想湊小朋友，唔識湊BB」。容海恩話「幾歲都唔想生啦喎已經」，覺得學校應該向小朋友灌輸湊小朋友係開心事，而唔係成日畀勞氣嘅父母鬧。
何啟明覺得「如果問一個小朋友想唔想生小朋友嘅話，佢梗係唔識答你，太細個」。佢建議容海恩要問啱問題，例如問小朋友想唔想要多個細佬妹，小朋友應該會答好想。
