保錡與Stanely的肌肉

最近MakerVille有兩個人好高討論度，佢哋嘅成長軌跡，證明無論係邊個、遇到咩事，只要堅持，一樣可以進步。係好老套，但就好似肌肉咁，講就易，只有做出嚟，人哋先至會真係睇到。

先講保錡，出道時形象一句講晒MK仔，加上感情負面新聞、網上鬧粉絲，形象插水。公司幫佢拍個電視節目慢慢建立積極形象，最近套《公司冇逼我跑馬拉松》更令人晚晚睇到佢嘅正能量。當然保錡自己都好爭氣，鍾意亦堅持跑步，練得一身肌肉，帶好多正能量俾觀眾。至於大表哥Stanley就唔使我詳述啦，成為MIRROR演唱會最高討論度之一，練得一身好肌肉唱《Fever》性感到暈，又唱歌送俾天上嘅媽咪，性感又得，感性又得。成功圈咗唔少粉，亦贏得好多人尊敬。

將兩個人放埋一齊，你會睇到只要肯堅持，只要夠努力，無論過程如何，最終都可以好似一身肌肉咁，可以俾人睇到。

你可以係︰
1) 入咗一個搞笑組合或；入咗一個偶像組合。
2) 一入行就掛住溝女或；未入行到而家都係同一位女朋友。
3) 經歷過負面新聞不斷，負評下傷痕纍纍嘅人生低潮；或經歷冇咩負面又冇咩正面新聞，硬係唔上唔落嘅嗰種消磨意志嘅困境。(補充一下，聽講Stanley佢想做演員，都有唔少機會，公司曾安排佢去台灣拍劇，上埋HBO。結果雖然套戲幾好睇，但冇乜迴響，繼續冇電影搵佢，呢種陰啲陰啲嘅低潮其實仲攞命，要堅持係仲難。)
4) 鍾意唱歌多過做戲；或鍾意做戲多過唱歌。
5) 二人唯一相同嘅，係佢哋都唔係孤軍作戰，身邊都有人一直陪住佢哋，唔放棄佢地，令佢地都勇敢地唔放棄自己。