中國式的維穩，有兩個重要的元素。第一，就是強力維穩。即是用最強大的武力，達到震懾的目標。咁呢樣你會好明啦，單係城管、公安、武警、國安、軍隊以及各式各樣的監視工具，連埋強力措施及法律，咁樣大家夠晒震懾未？
第二，就是強力資源。即是用最多的經濟資源，盡量做到人人都享受得到經濟發展的成果。咁你當然會話，上面貧富懸殊，仲有成億億聲嘅人響貧窮之情況云云。當然係咁樣啦，於是北方就用強力嘅方法，去將啲錢派出去，搞出去，盡量做好資源方方面面，強力到位啦。
於是乎，一邊打壓你，一邊派餅畀你。咁樣就係維穩的兩大元素。你唔shut up，就強力維穩你。你shut up，就派餅畀你。久而久之，頂唔順嘅，一走了之。留下的，就要硬食呢種生活方法。
呢種方式，你鍾唔鍾意都好，就係國情。零三年之後，上面對港強力控制，佢地唔會習慣港式政治之處理方法，咪會用佢地熟悉嘅方式，去指導香江啲人點樣去搞政治。佢地好自然想到，要處理香港深層次矛盾，咪去強力資源維穩啦。
五十億背後嘅思路，大家要慢慢細味。
老老實實，政府部門要加大某一個政策嘅開支，係應該點做呢？政府中人點會唔知呢？每年之預算cycle，都會競逐資源。響量入為出之思路之下，要加多啲某政府部門的支出，就要去一年一度之資源分配之星星大會(star chamber)去爭囉。如果係要某個大政策泵多啲水，都要醞釀㗎，下面傾好之後，就會齊齊問上面，部門阿頭包剪揼一輪，睇下有幾多新錢可以使，然後再submit上去，同最頂嗰個再傾，然後再決定。所以，點解某個部門之政策，可以忽然有五十億出來呢？點解唔係六十億、七十億，而係五十億呢？點解其他政策又唔可以有多五十億呢？
呢個問題，係相當令人困擾㗎。點解呢？如果我係局長，今日老細忽然心情好，話畀多五十億你去搞嘢，你又點樣做呢？呢種豪畀你睇嘅方法，始作俑者，就係曾特首年代。佢當年做香江一哥嗰陣，就好興一招豪畀你睇。例如佢忽然間響臨落台前，劃咗個五百億出來搞乜嘢醫療保險，吓！個個都O晒嘴，點解會無端白事圈咗個五百億出來呢？點解當時個鬍鬚財爺唔會話：喂！最緊要係財政紀律，點解你個老細亂咁圈五百億出去？
曾特首咁樣，後繼者就會有樣學樣。上屆政府，有個鬍鬚佬守住夾萬鎖匙，唔係樣樣都yes，自然惡搞啲。依家佢走咗，新人事新作風，會唔會手鬆啲呢？如果今次五十億嘅支出，可以拿到掌聲，泛民又開心嘅，下次又唔知響例如環保，又豪掟三十億呢？環團自然開心晒啦，咁又例如醫療護理放四十億呢？咁護士happy啦！ 咁財政紀律呢又點睇？