DSE放榜，門口大叔之千金，考到31分，還得神落。佢千金係文科人。我循例叫佢勸千金去讀神科，將來搵工都好啲嘛，係未？大叔真係清醒，話交畀個女決定，因為個女想讀教育之類嘅東西。大叔同我講：為人師表，學你咁樣。我立即閘住佢，叫佢千金唔好學我，因為我連一個稱職嘅時事評論員都做唔到，點可以教育下一代呢？
千金想報間大學響新界。撞啱嗰間轉校長。人地大學嘅家事，照理真係唔關我事，我亦唔係嗰間大學畢業，只係做流浪老師之時，響嗰度留過腳毛而已。
不過咁，一啲客觀環境嘅嘢，就唔係新界區大學獨有嘅，可以攤出嚟講。首先，香江嘅大學，響請領導嗰陣，有何優勢呢？答案係「思勞」，零。點解呢？香江嘅大學，經費太少，同鬼佬比，已經唔夠，同北方比，人地部分真係多過香江多多聲。香江商人，鍾意捐錢畀香江以外嘅大學，仲要大大嚿錢掟落去，但叫佢捐畀香江呢？香江商人的真實面貌就出晒嚟：你地啲大學，教出嚟啲學生好唔掂；你地啲大學，老師不務正業；你地啲大學研究，好離地，無乜實用價值……(下刪幾千字)。句句你地，夭心夭肺。香江啲大學領導，同香港商界搲錢，要將尊嚴丟去垃圾桶，先至頂得順。
香江唯一嘅吸引力，就係China Factor。即係外國學界領導響香江，做夠一段時間返祖家賣(中)國貨。咁即係當你香江地頭，係跳板啦，呢樣嘢，大家心照。再講落去，得罪人了。
香江大專界生態係，排名is king。呢十幾年，政府高層就用呢個指標去睇大學表現。久而久之，大學生態就會適應㗎。依家部分有水之學院學系，時不時就會請嗰啲做開香江研究經費撥款評審嘅專家，去到自己學系做訪問學人，出錢出力大搞協作。咁樣，無水無銀兩嘅學校，自然就無能力咁樣做。坦白講，學界呢，圈子唔大，來來去去都係嗰十幾個大佬(女性零舍少，有機會再講)，佢地假如千里迢迢來香江做研究評審，花幾天響香江，好容易走馬看花，睇唔到一間大學嘅研究潛力㗎嘛。如果佢地能夠多啲交流，多啲理解學系的潛力，咁呢啲口碑，一傳十，十傳百，對日後發展，梗係有利啦。
咁依家班大學校友，響鬧人點解做你地大學之領導時，要先理解呢個生態。好明顯，嗰位領導，對香江研究經費等生態，相當老練。以佢經驗來推動大學研究，推高排名，校董happy，政府happy，家長更happy。老老實實，大學排名高咗，作為校友嘅，係happy定係悲憤呢？家長會覺得間大學勁啲定差啲？家長幫自己仔女揀大學嗰陣，會揀排名高定係排名低嘅大學呢？大家不妨去多啲乜嘢王國之討論區睇睇家長的心聲？
