英國首相約翰遜
經濟要反擊。香江GDP上季大跌8.9%。除咗超市暢旺之外，其他行業真係跌到冇晒。成條街都係吉舖。英國呢？仲慘過香江。單係死亡人數，已經響歐洲超越晒意大利。依家英國佬仲響度計緊數，話英帝地大物博，人口又多，分布又唔同，咁如果用死亡率來計算，未必真係差得過意大利云云。呢啲嘢冇得拗，做得唔好就要認啦。
英帝部分傳媒焦點，依家轉移去問，政府嗰個神神秘秘、名單又冇公布嘅、負責疫情建議嘅專家組有乜嘢人。因為波叔成日講，英帝嘅措施係純粹根據專家，以及以科學嘅角度去處理。但係又爆出，波叔嘅最重要顧問，亦係波叔嘅國師甘明斯，居然又可以出席呢個純粹只係討論科學數據及政策建議嘅會議。其實，點解甘明斯會響度？正常人都會估到，因為波叔想施壓，唔想封關囉。不過斷估依家波叔唔同晒，因為佢經歷過鬼門關之後，依家已經唔係好信要盡快開關。寧願措施嚴厲啲，好過貿然開關之後，會出現第二波逆轉啦。
冇經歷過鬼門關嗰啲政治領袖，又點會有波叔嗰度切膚之痛，寧願慢啲開關，好過話封就封，話開就開。不過，美帝侵侵與眾不同。因為佢唔單止冇中招，仲明示暗示要求早些復關，唔好一路咁拖落去，搞到成個經濟淪陷。冇辦法啦，因為呢，第一，佢原本計劃好晒，要去各個州份做競選活動，拼連任嘛。如果各個州份仲係封關，佢老人家搞到要同fans響網上視像會面，好唔掂也。第二，佢都知經濟上，咁樣死頂落去，經濟碌到唔知幾時，依家佢老人家要拼經濟復元，唔早啲復關，經濟不斷沉底，真係暴動都似。大家要知道，傳統智慧講過，美帝總統大選，國家經濟先至係主軸，其他都係點綴而已。侵侵自詡經濟政策能力好強，冇理由搞唔掂疫症後嘅經濟呢？
所以，佢依家最需要嘅要響經濟上搵水，響外面班水。政治上搵外援出氣，轉移責任。所以近日炮火就轉去偉大祖國。大家未必留意到，侵侵講過，仲可以同偉大祖國徵收更多嘅關稅。好易明啫，與其用法律去提告，不知何時何月至搞掂，不如響關稅方面落多啲功夫，把關稅當作賠款，好向美帝國民交代。係呀，關稅協議仲未完㗎，本來依家係要開展第二次嘅談判，睇嚟因為疫情就唔見有公布。侵侵手上嘅牌，多的是。
5月有兩個重要日子。一個係English Choi響5月20日就職。一個係5 月21日之後嘅北京人大政協會議。如果侵侵要提升火力，製造緊張氣氛，咁呢個日子之前，就一定要有所動作，仲要令到唔少地方撻著火啦。所以最近東海、南海、台海都動作頻頻。大家都知，兩會素來係領導人最重視嘅大會，侵侵唔通想玩掃興？