學期尾比較多些空間可以約朋友食晏。老友聚頭，通常隨口問大家搞緊乜嘢。佢地通常估唔到嘅，係一，我居然響大學搵食；二，點解仲做緊晚清嘅中國習慣法。早幾個星期去澳門出席學術會議，上面學者講緊基本法嘅權威呀之類。小弟不才，唔識用德國Carl Schmitt之學說來演繹憲法與地方法律之關係，咪吹下水，講新界土地嘅婚姻及繼承問題。呢樣嘢，嗰次連北方學者都幾難對到嘴。因為可以對嘴嘅，斷估都係中國法學史之專家。佢地又點會對基本法有興趣呢？
但你又唔可以話，上面冇人研究新界。就係有，不過冇去呢個學術場合而已。所以，北方咁大，當佢地要鑽研一樣嘢，掉手指尾咁多資源落個漁塘度，就有一大堆人冒出來搞研究。越扯越遠，好，回到正題，老友聚頭就居然響度傾緊一啲佢地聽到好入神嘅案例。呢啲案例，當然唔係響香港法律課本睇到嘅案例啦，有時咪用下緬甸早期殖民地時期之案例，又或者民初大理院之判例，以至最近打鑼咁樣去搵識日文的朋友去幫忙睇嘅，日治時期台灣的「慣習」（日本用語，即係我地用嘅「習慣」）及判例。梗係啦，同一樣由清國輻射出去嘅華人傳統習慣，就會因為每處地方之風土習俗之不同，就會出現唔同嘅面向。
由細到大，我經常告誡自己，要讀懂呢個國家。年少狂妄，以為睇多幾次第N代導演影片，睇多幾種唔同角度嘅書，就可以搞掂。後來響上面工作，至知道自己幾咁無知。步入中年，開始詰問，以有涯隨無涯地去追逐當下之中國，點解唔去將有限之時間，去研究一啲係define緊幾代華人嘅事情呢？於是近十年又回到一啲晚清嘅事情。因為現代北方大國的構成，主要的改革面向唔止係革命，而係中國傳統之改革，當中響我老本行嘅，就自然係法律啦。
十幾年前，冇論文工廠做工人之「啤模」壓力，研究可以慢活，出品可以細膩，依家入咗行，變咗論文工人之後，反而唔可以得心應手。但就同多咗唔同人交流，刺激咗更多想法，對晚清民初之間嘅事情，又有唔同之體會。舊年有個隔籬省嘅智庫阿頭過嚟交流，呢位阿頭都六十幾歲，苦口婆心對我話，你嘅時間應該多做啲當下嘅嘢，解決依家嘅兩地問題。我尊重佢係前輩，冇即刻隊佢。但最後都發作話，研究晚清，就係用嚟理解當下嘅中國。至於兩地問題，大把官商社會賢達出謀獻策，幾時輪到我呢？
舊年出席敝校學生會之六四論壇，我講咗一句「比中國更中國」，意思就係咁。青年唔去悼念六四唔係問題，但係就要超越華叔嗰代人的對中narrative，打低老外如David Shambourgh等嘅中國論述，咁樣至可以思考未來，應對更艱苦之環境。
