仲記得本欄的初心，係要畀大家知道，條街發生乜嘢事。好耐冇出街四圍行，不如又講吓呢期有乜嘢聽？
嗰日去排隊拿久石讓飛（我係好有文化素養），轉頭撞到老友A。老友A 好耐冇見，一講開風哥搶電話單嘢，佢就話大家唔好聽阿邊個呢個嘅說話，因為嗰啲加鹽加醋嘢，因為xxxxxxx（唔好意思，唔講得），總而言之，有個位響巡邏影片睇唔到，所以xxxxxx（又係唔講得，sorry），大家睇完都O晒嘴。
老老實實，我問老友A，既然係咁，件事都幾頭痕。老友A 歎曰：好多時，大家都要知道，依家時勢唔好，劣勢處處，仲要搞啲咁嘅事，大家又焗住撐，好難搞也。我就話，網上個個炒蝦拆蟹，個個響度鬧四方阿姐同AV哥玩切割，點先？老友A話，佢地咁樣做，都係要救個形勢啦，如果唔係兩位老人家出嚟鬧，件事隨時燒到唔知幾時。依家兩位老臣子鬧完，對家就收聲啦。
當然，我理解老友A嘅，佢地啲粉絲，都係老餅些少，保守一啲，而且真係有選民媽媽聲，呢班粉絲都係覺得咁樣做好差。老友A話，反正做乜嘢都死㗎，依家見招拆招啦，隨時嚟緊十一月又有審訊，如果有人斷正坐監，又要補選，又要呢樣嗰樣，邊有咁多水？大家剩係守住度門已經謝晒，邊有時間同精力仲去搞其他嘢呢？
見完老友A ，轉頭又坐地鐵去荃灣，一眼就見到老友B。老友B心事重重，原來佢認識嗰三位朋友，日日為工人，天天去幫人，最近畀老細炒咗，好唔開心。我話，咁樣炒人，有乜嘢事呀，係未人地人工太高呢？（我當時都唔知，原來佢地啲人工真係好低）因為我仲覺得，信馬克思主義嘅政客，都係好人嚟嘅。響呢個「毛聞」(moment) ，仲有人咁公然響香港講自己係馬克思信徒，真係連西環人都唔敢啦！
老友B 曰：你地外人有所不知矣。點會係人工問題呀，而係聽聞，因為有一位馬克思主義者，佢想永續參選，下屆繼續，下面上唔到去，咁樣，裡面有糾紛好耐矣。
我同老友B講，坦白講，邊個話共產主義信徒唔可以參選？日本共產黨最終都要參加議會政治，印度有共產黨都響地區執政啦，係未先？其次，黃絲政治同華人政治文化一樣。有一樣嘢千祈唔能夠講，就係叫人家退下。老老實實，有燈就有人，有人就有燈，果盞燈點咗三十幾年，有人有關係有資源有朋友有利益樣樣齊，你想退，身邊嘅人都唔想你退。
老友B曰：咁冇理由永續落去囉，聽到都愕咗然。
我曰：香港地區小政黨，素來自給自足，邊有咁多資源呀，萬一盞燈熄咗，朋友老死鳥獸散，真係恩格斯翻生，畀錢救唔番。呢啲江湖嘢，外人都唔知點樣解決，唔識講矣。