全球肺炎疫情亦影響美國總統選舉。
只要有公共性，就會有政治。只要有件事，成為社會議題，政治就會出現。沒有不政治化嘅社會議題，只會有開口埋口叫人唔好政治化嘅政客。響武肺橫掃全球之際，玩疫症政治玩到出神入化嘅不只是北方大國。而係美帝。
外界以為，今次侵侵一定俾疫症拖死。傻啦，侵侵響操作政治議題上，殿堂級啦。佢搵副總統彭斯去抗疫，人地以為佢傻咗，但佢不知幾聰明。響對中政策方面，彭sir係黑臉，侵侵係白臉。侵侵搵強硬抗中嘅彭sir出來，就係要講俾美帝人民知，要打低北方大國嘅病毒，就要有彭sir呢啲咁硬淨，專消滅紅色為己任嘅人，先至可以搞得掂，明未？
仲有，侵侵又借呢單嘢，猛講如果冇強而有力咁去遏止難民潮，嗰堆非法難民隨時會帶啲病毒入嚟美帝。佢唔係針對北方大國，佢係講緊墨西哥，於是侵侵又重提要關閉美墨邊境云云。武漢同墨西哥嘅交集，就係響侵侵嘅說話中相遇。侵侵政治冇得輸啦：如果疫情唔可以控制，佢就會鬧北方大國播毒。如果疫情響民主黨嘅州分發生，就話民主黨抗疫不力。如果疫情響共和黨主政嘅州份爆發，就梗係賴民主黨響抗疫問題上阻頭阻勢啦。如果真係美帝各州大爆發，咪炒咗個疾控中心老頂囉。外界以為武肺會搞到侵侵冇得連任，發開口夢乎？
翻開美帝媒體，日日都係武肺做頭條，二條就係追蹤美帝民主黨初選選情。早前我都有提，響選情方面，究竟侵侵最想好夢成真、必定令佢連任有望嘅桑德斯跑出，抑或係美民主黨內精英最鍾意嘅拜登勝出。點知過往一周，拜登有回勇之勢，贏返幾場，似乎有力帶到入去決賽。至於桑德斯，超級星期二表現就差些少，但就未至於出局。不過，大家就可以睇到，響民主黨黨代表大會嘅最大票倉加州方面，桑德斯似乎都係跑出。點算呢？民主黨精英要拜登走中間路線，佢地另一邊就要桑德斯打爛個體制。依家就要睇究竟民主黨嘅old seafood有幾大能量了。
每隔十年，就係新時代同舊時代出現世代交替，今次真係體會到嗰種極其嚴重及尖銳嘅對立。英帝工黨上兩代嘅政客，一直都覺得，工黨要贏返政權，就唔可以走極左路線，所以彬叔就唔應該領導工黨。另一邊廂，保守黨嘅精英，就嫌波叔太過反歐洲，立場偏激，同歐洲為敵只會令商界冇晒收入，人民唔鍾意。偏偏呢，呢兩位響黨內立場最極端嘅人相遇於國會選舉。依家啲政黨黨員，要拆爛體制，打爆上一代嘅「豐功偉績」，所以佢哋就揀咗波叔同埋彬叔做黨內領袖。選民嘅口味，英美都好清晰：寧願要顛嘅右派，都唔要一個極左派。而且，佢哋有一個更強力的訊息：將體制打個稀巴爛，攬炒！