依家全球最風騷嗰個，一定係英國政客Nigel Farage(圖)奶嘴哥。唔講唔知，佢仲未響英國政界消失。事緣過往十幾二十年，佢都係英國政界邊緣人。點知2016年英國保守黨搞脫歐公投，奶嘴哥之風潮，一時無兩，大力宣傳脫歐，居然又出到位，結果又畀佢響公投偷雞成功，兼且仲可以去美帝教侵侵點樣選舉。
英國佬畢竟係(偽)君子之國，奶嘴哥後來畀人發覺佢吹水太過份，脫歐成功後又笠水，唔肯幫手收拾殘局走咗，當然又畀傳媒鬧一輪之後靜咗一排。依家唔同晒，因為英帝May姐搞脫歐方案，搞個大頭佛出嚟，真係冇人敢膽可以響六月之前搞到個國會同意嘅方案。咁樣，英國就要準備歐洲議會之選舉。歐洲議會選舉呢，素來大黨之粉絲又唔係好出嚟投票，一直都係嗰啲邊緣政黨，特別係奶嘴哥通常都贏到。係呀，好笑㗎，英國選民選出支持脫歐之政黨去歐洲議會做議員，即係選佢地出來去布魯塞爾搗亂。民主多元嘛，歐盟係畀錢呢班支持脫歐之議員響議會大放厥詞。依家要歐洲議會選舉，奶嘴哥即刻開動機器，繼續唱衰全宇宙，由May姐唱衰唱到社會主義工人黨。
點都好，佢地呢位大哥同佢嘅盟友，選情如何先？有口痕友話，佢地贏的機會都好大。吓！佢地搞完件脫歐事情依家又搞過，一樣贏？
以前社交媒體冇出現之時，傳媒傳統上係成為導引輿論之地方。咁傳統傳媒傾向中性及平和，推動多元之進步價值，呢類邊緣政黨真係好少人支持。但社交媒體將佢地邊緣聲音響另一邊爆發，慢慢儲落唔少支持者。到了選舉之時，呢班支持者就會撲晒出嚟投票也。
所以，唔好成日以為美帝總統侵侵好唔掂，貿易戰會搞到佢輸硬總統大選。響美帝，呢類邊緣聲音，好多時佢地響一啲議題上，例如女權、同性婚姻、氣候轉變等，同主流的聲音唔同。響歐洲，呢啲極端保守之聲音，會有唔同之小黨，幫佢地出頭。響美帝，呢啲聲音，一直唔可以響主流傳媒睇到。侵侵呢？就將呢啲聲音收歸旗下。咁侵侵響打擊性別平權，反對同性婚姻，拒絕氣候轉變方面，梗係戰績彪炳啦。響呢個前提下，外界叫佢響貿易戰收手？真係發開口夢也。
侵侵連任之路，唔單只係中美貿易戰，而係佢響其他方面，即係打擊進步及多元價值方面，真係做到功夫，所以連主流嗰啲傳統媒體，都知道侵侵連任之路比四年前佢出來參選時容易咗。而且，今時今日之侵侵，已是體制下的九五之尊，擁有大量行政資源輔選，仲可以不斷抹黑美帝民主黨之總統參選人。所以，任何人以為，仲落注以為民主黨會翻生，真係同賭車路士下屆會贏英超冠軍一樣。唔係唔得，係好困難囉。