先後搞了兩個星期，咩嘢獨立議題，終於響「殺無赦」的一句之後，暫時落幕。
上星期講過，過往五年，曾經有一班人風光過。佢地將某黃絲傳媒金主用開之招數，發揚光大，仲要更激，刀刀插番泛民人士。於是，一時之間，刀光劍影，吓吓狠勁，一抓就靈。影響所及，成班北方在港政治人物，齊齊向左轉，越左越有好處，甚至可以當立法會議員。
咁好多人簡單地分析為，拿了維穩費，佢地咪用左去反港獨。世界邊有咁簡單？總而言之，有資源之後一切就好辦事。假如今日要去操弄港獨議題，先做好仔細分工，首先自己友出去示威，然後就抓住某個人士的言論解讀，無限伸延，總之就要同港獨拉上關係，另一方面，就有一隊team做直播整Graphic度口號，總之就炒熱件事。
點解佢地要咁激？老老實實，佢地唔激，就唔能夠刺激到非建制派之反應。呢個世界，有作用力就有反作用力，咁樣成個社會就撕開兩邊。當社會撕開兩邊，局面就變得好危險，咁樣上面之維穩費要增加多啲啦，係未？但更重要嘅係，響呢啲時候，就唔應該隨便換人，仲要將自己的親信，安插響唔同的委員會呀，宗親會呀，校友會呀，總之就自己人玩晒。
呢啲法寶，四個字：越亂越好，大部分市民唔接受，但呢啲在地感受，搵緊食嘅人，由上到下點會理你感受啦。總之，有食唔食，罪大惡極。好啦，經過五年，上面忍夠啦，於是就換咗香江領導。香江領導換咗，呢個領導鍾唔鍾意呢種撕裂搵著數嘅社會管理方式？似乎佢唔係好受噃。
咁過去五年靠呢樣嘢發圍嘅人士，梗係好有壓力啦！香江唔同台灣。台灣政黨輪替，就意味咗每四年，就有機會搞一次資源大重組。於是台灣嘅政客，講緊搵著數嘅政黨，佢地會好關心，如果唔響四年掠盡資源同著數，對唔住自己同朋友。於是台灣政客，有權就用盡，有資源就掠盡。呢個係制度使然。
香江呢？因為點都好，香江到底都係黨領導下之特別行政區，照理好少出現呢啲資源上分配不公平之情勢。但係，即使都係建制，都有唔同派系，亦存在分歧嘛。只要有人就有燈，幾支燈有時要和解，一齊為一件事做嘢，就要等北大人開句聲，但當北大人唔開聲，就會各自發揮，互劈一餐。
如果大家明白上述情況，就會知道點解某類人士，過去兩個星期有怪現象。777會唔會將過往五年的人和事，作一次大規模的修正呢？會唔會借修正為由，整頓清算為實呢？如果係，又會點樣做呢？好嘞，如果777唔做，北大人會唔會做呢？北大人有幾支持777 呢？萬一香港局勢忽然變得好亂，不如將西環一哥之離任時間，推到下年年中啦……所以，對事件無需動氣，慢慢睇，總有蛛絲馬跡嘅！
