觀察北方政治，素來唔係我強項。我通常會多睇夫子劉銳紹響本報之專欄，又或者潘小濤嘅文章。自從小濤響他報被封刀後，其他前輩也陸續封刀或封半刀，依家唯有問多些老友學習學習矣。
老友A有日專登整個「屈濕」提醒我一件事。就係響西環小明被調走前後西環言論之變化。老友A話，有冇留意，響小明北調之前，成個社會唔知點解，要響大學裡面猛咁反港獨，反到天覆地覆，但好奇怪，素來係北京風向指南針嘅佳叔同埋范太仲係粒聲都冇出，而且，一班有頭有臉嘅一線北方政黨人物重量級人士全部都失蹤冇表態呢？
老友A話，成件事相當奇怪，因為如果真係北方主席的一條總路線，點解唔係有大家熟口熟面嘅人士出來輪流鬧死班大學生同泛民呢？老友A話，如果北京重量級人士唔集體高調表態，成件事就好古怪也。即係小明響北調之前，同西環有密切關係嘅組織同人事，點解突然咁高調地會借港獨呢個議題去做事呢？係因為佢地想夾死777，唔想佢走和氣之路線呢？又唔通係搞到香港社會面對懸崖之邊，借勢借頭借路想夾死北方人士唔想咁早北調繼續做山寨王呢？唔知啦，總之係響小明北調之前，北方對港政策的top priority，好似只有反港獨。
但係，老友A提我，要留意早幾日左報一篇福建幫大佬盧sir執筆（斷估都係有人代筆），講得好白，就係西環Chi Man講話的最新解讀。一看之下，非同小可。老友A話，呢個係西環Chi Man，代表緊北方大佬一哥，未來至少一段比較長嘅時間之施政方針。你話係西環施政報告嘅大綱都得。
老友A提醒我，按照盧sir呢篇文章之精神，西環之施政方針按照次序排名嘅話，第一個就係撐777就係等如撐北方大佬，依家北方大佬撐硬777，換言之唔准篤佢。第二，就係要跟北方大佬做事，即係絕對忠誠及跟隨北方大佬啦。
第三就係要搞好經濟，即係one belt one road及大灣區等東西。
第四，係第四，先輪到反港獨，仲要得一個小段落。最後先至係同泛民繼續溝通。
我一聽完，就好似畀人扑穿咗頭一樣，醒晒。換言之，響小明北調之前，任何想借反港獨去夾777嘅做法，咁樣係冇用嘅，因為等同反對北方大佬。第二個訊息係話畀大家聽，反港獨係重要，不過響上頭要求西環做事之優先次序方面，係排響第四位。即係點樣？即係代表北方大佬依家要求大家，撐好、好撐777，唔准動搖。撐佢做乜嘢至係重要？黨員嘅，唔該你忠心個黨，跟北方大佬之說話辦事。唔係黨員嘅都要團結去搞好經濟民生嘅事務。老友A話，做好頭三樣嘢，已經會用咗唔少時間，言下之意，大家唔好成日好似唸大悲咒咁樣，日日去反港獨啦，係未？
老友A講完，明晒。
