農曆新年後首次同各位讀者見面，在這裡祝各位讀者萬事勝意，身體健康。
學校已進入下學期，值得搏殺嘅當然係學生，亦係開始學生哥唔上堂去搞呢樣搞嗰樣又見工又去搵見習職位的時間。與此同時，亦係有學生搵老師寫推薦信之時。
好多時，學生哥走來問我寫信時，我都循例會問下，究竟佢地想讀乜嘢，佢地又好循例地答。講講吓，佢地又有時問下有乜嘢值得讀。
我通常都會答，去得海外讀，就應該讀一啲你想學嘅嘢，唔好浪費屋企嘅錢，因為反正你讀完返來香港，除非老竇老母有人脈有錢財有資本有能力，你返來都係賺萬幾銀一個月，仲要畀上幾代管理層背後鬧你廢青無腦死黃絲，不如讀想讀嘅嘢，充實人生，就好似海綿一樣，索晒啲鹹水返來香港。如果響外國搵到工，直情唔好返來……住，真正響外國生活，切實理解外國風土人情。
如果冇乜想法，我都係鼓勵佢地去讀強國研究。講到呢度，我唔係話指定佢地去讀乜嘢強國改革開放經濟政策呀或者各國共產黨研究呀之類，而係關於強國的研究。乜都得。秦史、文化史又得，明代戲曲又得，努爾哈赤都得，總之係anything related to 強國。Again，反正你讀完強國研究，返香港都唔會搵到嘢做，都係嗰啲一萬幾千一個月，畀老細寸你廢青死黃絲的唔知乜嘢工作。
但係，千里迢迢去海外讀書，點解要讀懂強國呢？響香港，好多學科部門有好多條框，表面上學生可以揀好多科目去進修，但係因為主修副修等要求下，而且通常同學都想搵一啲易入口又高分嘅學科去chur grade。所以嗰啲強國研究有關的課程，唔會太大班學生，而且又會係簡介易入口為主。但出去海外進修，就要趁機去睇下海外學者係點樣去睇強國，學人地之理論框架。香港人又識中文，西文又ok，點解唔去學多套拳法呢？
至於讀乜又係冇所謂。中華文化咁源遠流長，大部分都係under research，咪走去讀啲有興趣嘅東西囉。喂阿哥，假假地幾千年之文化，總有樣嘢啱口味啩？例如你早幾日見到某高官上電視之衣著，真係幾犀利，總有古代宮廷服之影子，咁好多網上KOL就真係唔知呢啲嘢，亂鬧一輪，咁或者你又會唔會激起興趣，想讀下關於某個王朝的宮廷服飾之沿革呢？
理解大國，唔需要因為你非常想去大灣區做嘢咁功利，而係因為佢係一個響你隔籬，日日對住你嘅強國，係聯合國安理會五個常任理事國之一。Sooner or later，你都要同佢日日交手。要理解晒呢個有幾千年歷史之強國，人生有涯，根本冇可能。但係只要用功響某個小關節上，就大概會有助理解，呢個崛起強國，點解會有依家咁樣嘅思考方式及解決問題之方法，點都好，都係有用嘅。