如果你真係諗唔到送咩俾人好，又或者同對方有仇，送呢款近期大熱嘅韓國「雞仔牌」雙倍加辣撈麵必定係首選。真係要趕快入貨。邦主當然有買到，亦親身去挑戰噴火撈麵，自信以邦主嘅食辣程度應該不致於被擊倒。頭兩啖覺得甜甜辣辣非常好味，點知邦主一瞬間已經跌入火辣地獄。結果，食完之後個咀好似化咗啱啱經歷完一場激烈親吻嘅Snogged Lips妝咁，雙唇變成一孖又脹又紅潤嘅膶腸，兼短暫失去味覺！但又十分回味呢種被佢虐殺嘅感覺！所以過兩日又食過！其實呢隻麵有出黑色包裝嘅普通版，喺香港都有得賣，大家不妨試咗呢個入門版先。
講開食辣，大家有冇留意喺韓國餐廳食飯時經常會有幾隻新鮮嘅青色辣椒仔做伴菜，原來呢隻青辣仔好好食㗎，咬落清脆帶點微辣，如果想味道豐富啲，仲可以好似當地人咁點少少麵醬食，用嚟伴湯麵或湯飯真係嗜辣者至愛。
如果想要唔辣嘅零食，邦主就同大家一樣鍾意去大型超市掃貨。發覺原來當地出產嘅柿乾同栗子都非常好食，返到公司即時被秒殺。仲有就係有汽果味燒酒，除咗桃味外，芒果同蕉味都不妨一試，真係蕉有蕉味！