每次行街見到柴犬時，邦主就好自然諗起日本忠犬「八公」，佢係日本最著名的秋田犬，佢咁出名，全因背後有個賺人熱淚的故事。話說當年，東京大學嘅上野教授飼養咗秋田犬「阿八」，阿八每日都會去澀谷車站接送教授返工放工，日日人狗飛奔擁抱。可惜，有日教授不幸地上上吓堂「走咗」！可憐嘅阿八唔知道主人唔會再回家，仍然堅持喺車站等教授放工，直至等到離世嘅一刻。當地人為咗紀念阿八，仲特意製作咗「忠犬八公」嘅雕像，豎立喺澀谷車站前，而家更已經成為一個世界知名嘅景點。邦主都排咗一陣先至影到相，所以大家去到澀谷記得去探阿八。
探完阿八之後，由於心情太過沉重，所以去咗六本木之丘嘅「森大樓」52樓，睇番個無遮擋嘅東京全景，舒緩一吓心情。呢個擁有360度玻璃牆嘅觀景台，可以一次過睇晒東京鐵塔同東京晴空塔，真係無論日夜景都咁得。