估唔到宋慧喬同宋仲基真係結婚，所以，邦主決定喺一眾「喬兵」同「基迷」嘅傷口上灑鹽，一齊去重溫吓當日佢哋擦出愛火的地方。
位於江原道古汗邑的三炭藝術礦場，除了搵到三大《太陽的後裔》場景外，大家仲可以透過呢個由礦山而改建成的文化藝術空間，了解韓國礦業歷史文化同觀賞藝術品。入場時，建議買20,000WON套票，包括入場劵、礦夫便當同咖啡。整個藝術礦場有4個樓層，劃分為藝術住宅區、博物館、美術館、礦場藝廊、藝術遊樂區等等。
講番《太陽》的拍攝點，喺藝術住宅區其中有一間房間就係拍攝時宋仲基待機休息的房間，而家門口都有告示講明㗎。入口處仲掛著縫有劉時鎮同徐大英姓名的軍服及帽子，俾大家試穿拍照留念。再落去，大家就會見到劇中喬妹被綁架的地方同佢坐嗰張椅，仲有投影播放劇中橋段。再行就會去到舊礦區鐵道博物館，即係大地震時大家慌亂逃生的拍攝現場，呢個礦區真係好有荒廢後堆滿灰的感覺。最後就係戶外破舊的鐵皮屋，大地震後主角相見的地方。行完啱啱兩個鐘，係時候去食礦夫便當！