唔去過花蓮，真係唔知呢個台灣秘景有咁多嘢玩，上天下水咩都有。當中包括一系列嘅驚險刺激戶外活動，好似獨木舟、衝浪、攀石及飛行傘等等，但坐船出海觀鯨，就唔係度度都有得玩。由於花蓮旁邊就係太平洋，所以魚穫特別豐富，就連好多鯨魚同海豚都吸引咗嚟搵食。因此，花蓮成為賞鯨成功率非常高嘅地方，船長話每年6至8月風平浪靜就係觀鯨最佳時機。
除咗戶外活動，為食嘅邦主亦都有去體驗一下當地美食文化，去咗位於吉安鄉南濱路嘅「阿美麻糬阿美小米文化館」玩麻糬DIY，親手造呢款花蓮名物。大約30分鐘嘅工作坊，大家可以體驗到點樣將一碗花蓮特產，紅粟米飯搗到變麻糬，最好玩就係搗米過程中，米嘅黏著度會增加，所以，愈搗黏性就愈強，用嘅力就要愈大，好有做Gym嘅感覺！最後，可以製成3大件紅豆麻糬，可惜因為冇防腐劑，所以要即日食，做唔到手信！不過，唔緊要，落番地下就係店舖，大家可盡情入貨，各式糕點、小食應有盡有！而其中有一款「晶沙酥」更加係皇牌產品，味道有啲似鹹蛋酥，但勝在夠鬆化。