近日天氣突然轉熱，又係薄衫、短袖、短褲、短裙出場嘅時候，對more 女們嚟講，亦係最傷腦筋嘅時候，秋冬時就話可以著下長袖、長褲遮掩下，加上質地較厚較挺，唔會出現一截截，但夏天就真係冇得避，要見肉。好多人問我，以我180磅，三圍41、35、40嘅More 女身材，點解可以著到唔似咁嘅磅數，其實係有秘訣，接下來幾星期，我會同各位姊妹分享一下少少我嘅心得，希望可以一齊著得靚靚過呢個夏天。
要顯瘦首先一定要做好嘅，就係要打好個底。工作關係，發現好多女士都著非常柔軟但冇乜承托力嘅胸圍，而且可能為美觀，胸圍帶都比較幼，背部嘅肉包得唔多，好容易出現一截截嘅情況，我嘅建議係，最好著包得多嘅，承托力好啲嘅胸圍。好多上圍豐滿嘅女士誤以為胸圍承托力好會令胸部顯得更大，唔好睇，但其實胸部大小是其次，挺唔挺先係重點，下垂嘅胸部會令人顯得老。挺起胸膛做人先係最重要。而且胸部就算大嘅，相對亦會令腰部顯得幼嘅。加上而家好多收肚褲，係可以拉到上胸圍底，同胸圍無縫接合，完全將多餘嘅肉收起，唔會一截截顯露出嘅，成個腰形出番嘅嚟，著衫自然好睇好多，最開心係，而家嘅收肚褲同以前唔同，冇咗長長鐵線，只有頂部4條短魚骨，唔會向下捲嘅同時，亦非常舒服，著足一日都冇問題，有啲仲可以收埋大髀，令線條更加靚。所以話，打好個底，著咩衫都會靚好多。
