一位難求的廚師發辦‧鮨晴Sushi Hare

到底香港人有幾鍾意食壽司？尤其是Omakase，去唔到日本嘛，只好留喺香港食，剛性需求，所以鮨乜鮨物開完一間又一間，當中有好有壞，最近更有YouTuber arho親身去「X見」試伏。為免中伏光顧前最好上網做足功課，FB群組「香港Omakaseおまかせ關注組」會有好多大神提示，跟足指引錯不了；不過好多都是預約困難，有些網上預約隨時等半年或以上，有些更是電話長期不通，「鮨晴」Sushi Hare就是其一。八人吧枱當中除了我其餘七位全部是熟客仔，當中有「鋒膳」老闆Nansen、「Avize Wine Cellar」老闆Ricco，我一po上IG，立即收到好多DM問點book，非常誇張，我亦如實回覆掹朋友衫尾(特別鳴謝好友潘小熊)，幫唔到大家，幾時都話識人好過識字。

鮨晴一位難求？

為何鮨晴一位難求？先說價錢，午市約一千，晚市亦只是二千左右，比起好多神級鮨店動輒近三至四千平上一大截。主廚稻塚基晴(Motoharu)並無將價就貨，反而用最好最當造魚料奉客，Omakase出現春初鰹、白露筍、春筍、櫻花mochi，充滿春天氣息；沒有大量海膽的wow factor，亦沒有過多無謂topping，只有醋飯魚料與醬油，Moto San透過一貫貫的壽司向食客展現傳統江戶前手藝：金目鯛──新鮮食用的話肉質爽彈，經過十日的熟成處理，效果截然不同，入口柔軟魚味亦變得濃郁。黑鯥──赤鯥的朋友，偏肥高級深海魚，用備長炭略燒一會(高級鮨店唔會用火槍咁cheap)，經炭火洗禮後，入口陣陣油香誘惑，銷魂蝕骨！鮪魚出場時，Moto San換上較暖的醋飯，酸度和濕度與中拖羅，赤身極之配合，出色的握工加上友人Ricco的布根地紅酒(Corton Clos du Roi Grand Cru2002)，鐵味酸味與黑皮諾在舌尖上共舞，原來用舊年份布根地同醬油漬赤身是如此好配搭，長知識了，我俾滿分！為何寫稿總是餓，二訪鮨晴，我要等到出年。