職場攻心秘笈—想過肥年：7招討好上司 (上)
【前言】
自《EC職場周記》面世以來，原本的讀者認為以小說形式吸收職場心理學，較寫實、易投入；但新加入的讀者則認為好像插班生，有「甩頭甩尾」的感覺……為了兼顧大家多元的需要；從今開始，專題式的文章：每月兩期；小說式的：從今期開始，逢三、五早上刊登。多謝大家支持！
【就快過年！】
碧姐：「各位同事，留意一下，還有11個星期多就農曆新年……請大家今天收到《假期結算表》時，檢查一下；倘若記錄跟你的實際有落差，請儘快提出……若大家有年假要清，又想接著農曆年假期放的話，也請於下週內入紙書面申請……」
楚丁：「畢哥！咁又過年……唔經唔覺，咁就做咗3年幾啦！你就好啦！大家一齊加入，你現在就貴為『畢經理』，我就一直都係『阿四』！」
畢哥：「鬼叫妳改錯名咩！好叫唔叫，學人叫『阿丁』，當大家有『豬頭骨』唔想啃時，咪諗起『搵丁』囉！」
楚丁：「咁我都唔想㗎！」
【過年前討好老闆】
畢哥：「咪話我唔教精妳！我最近出街見客時，跟出面同事吹水，學到過年前：7招討好老闆的『攻心秘笈』，今日袋啲錢入妳袋；到時，出多咗花紅，記住逢糧尾就袋返啲入我袋，救濟一下我呢啲『月光族』。」
楚丁：「乜過年都有『攻心秘笈』，快啲分享下，好想知……」
【埋年攻心秘笈】
畢哥：「呢個秘笈，係高人傳落嚟，共有7招，妳快啲攞支筆寫低佢。」
楚丁：「等陣！等我……」
畢哥：「第一招《有假唔放》，意思即是：當碧姐正在跟進大家假期記錄之際，老闆就自動被提醒了妳今年的缺勤表現，無論好壞，只要他想起妳該天，剛巧妳又請假無返！咁就『啱啱遇著個剛剛』……」
楚丁：「即是點呀？唔俾放假咩？」
畢哥：「咁咪斷正囉，傻妹！寧比人知，莫比人見嘛！第二招《有借有還》，意思即是：若果妳有任何向公司借咗「IOU」【註1】、物資、未完成的工作……最好儘快擺平！一年將結，各部門都埋數，交報告；若果妳名字經常出現在各報告之上，功勞就話好啫，『欠債』記錄就認真失禮！印象分大減！」
楚丁：「好彩比你提一提，我好似每樣都有些少……」
畢哥：「估到妳啦！識咗咁耐，讀書妳就叻！科科攞『丁』【註2】，出嚟返工，個戰場唔同咗，啲生存攻略都唔同晒㗎啦！」
楚丁：「我都發現！返學時，我幫你多啲！返工後，大事通常都係你幫我，我可以幫你果啲都係小事居多……」
畢哥：「咁又唔好咁諗！大家都係返份工，盡力做好職責，互相照應下咁啫！不過返工就講求包裝多啲！」
碧姐：「喂！楚丁！妳快啲檢查多一次各同事的《假期結算表》，儘快派咗比大家先……咪成日掛住傾偈，學埋阿畢啲壞習慣！」
楚丁：「畢哥，傾住咁多，今日午飯你唔洗見客，我約你食飯，到時再學埋剩低果5招……」
【下期待續】
【註1】IOU即是：「I owe You」。一般是簡單的便箋，用於Petty Cash，以記錄一些非常規的欠款。
【註2】「丁」又常用於「Distinction」的同音，意思是成績優異的級別
《EC職場周記》角色介紹
本劇主要圍繞4位主角，分別是兩男兩女
趙達標：總經理。任務導向，人緣方面就……
崔畢源：銷售經理。開朗樂天，講就天下無敵……
歸楚丁：初級文員。任勞任怨，平易近人……
沈碧堅：行政主管。有原則，要求甚高……
相關文章：