馬暈喺AM開壇以來，一直都係樓市好友，所有分析建基於一樣嘢，就係香港整體經濟真係幾唔錯，最緊要就係，失業率維持在超低狀態，幾乎係有工無人做，拋得個身出嚟嘅，無乜可能搵唔到一份工做。
但最近個情況開始令到我少鹽少糖，淡淡地，甚至相信樓災已經逐步成形。有朋友可能質疑，出現股災出嚟轉唱淡風，係人都識，Well，股市最近形勢只係佔咗我睇淡理由嘅十分之一，最大問題係，經濟不知不覺之中正步向下調階段係最令人擔憂。
近月銅鑼灣尖沙咀核心零售區嘅吉舖愈來愈多，租金更加大幅下調。呢類一線地段嘅舖位，主要係靠奢侈品店去承租，經濟一轉風向，消費者第一樣Cut嘅就係購買唔等使嘅奢侈品，所以佢地係經濟寒暑表。
你哋唔好以為呢啲店唔掂，唔代表其他都衰，呢個絕對係一個火燒連環船嘅效應。奢侈品嘅消費降低，呢類公司嘅開支預算大減，背後服務奢侈品嘅公司好似公關、廣告、媒體等等嘅收入全部大跌，你睇到TVB條數就已經知道得一清二楚。呢堆公司又減開支預算，再背後嘅公司例如IT用品等，以至二三線區寫字樓租金都會有壓力。
樓市轉勢嘅東風就係失業率。當大部分公司都凍結佢地嘅開支預算、凍結人手招聘，甚至係削減預算，咁失業率亦會轉勢頭上升，呢浸風一吹，我估計平均樓價屆時已經跌咗一至兩成，並且會繼續呈下跌趨勢。地產商投資會極度審慎，只要有幾單批地地價低過市場預期，加入減價大軍嘅業主會增加，樓災就會正式降臨。