小弟嘅唯一偶像、香港首富李嘉誠近周成為中國傳媒槍口對準嘅目標。內地股市一輪嘅下跌之後，中國傳媒忽然「燈」咗一聲，「新發現」李超人早早就已經撤離中國，高位拋售中國資產「腳印印」食住花生等睇戲，於是評論文章一浪接一浪，將李超人推上去浪尖，阻唔到超人飛走，都要口誅筆伐呢位亞洲首富。
超人拋售中國資產係早喺幾年前已經進行，將唔少貴重內地物業一幢幢咁出售。馬暈都唔止一次咁講，超人最出色係佢嘅前瞻性同執行能力，佢睇前個世界十幾廿年，由大力投資全球3G建設開始，大家就知道佢嘅眼光係放到幾遠。超人拋售中國資產、整合香港上市王國、遷冊等等，目的就係要將家族財富日後面對嘅政治風險降到最低。喺現今全球一體化嘅環境之下，咁做絕對係無可厚非，你可以話佢逃離中國，但更實際咁講，超人只不過係唔想雞蛋放晒喺一個籃。
最好笑嘅係，中國傳媒雞仔唔去管，淨係管麻鷹。咩係雞仔？
《國際人才藍皮書：中國國際移民報告(2014、2015)》就話，2013年有71798名中國大陸移民獲得美國永久居留權簽證，而喺2006年全年，中國投資移民美國人數只係區區63人；資料顯示，2014年全年通過投資移民到美國嘅「愛國者」中國人就有9128人，係當年美國頒發簽證中佔咗85.4%，雞仔多到呢！
澳洲都好誇張，2008至2012年期間，平均每5個投資移民澳洲嘅外國人，就有3個係好愛國家嘅中國人；2014年英國批出嘅投資移民簽證，47.9%又係田二少口中所指膚色同眼睛一睇就知係屬於邊個國家嘅人。
喂！我真係要講聲「大佬啊」！咁多人出走海外，仲未計班去晒外國讀書嘅官二代、三代，仲有口口聲聲要香港學生認識祖國、自己又送晒仔女去英國讀書、海外資產多過喺香港資產嘅梁振英，咁多人唔管你就走去管李嘉誠？算把啦你！