海航實業再以癲價每呎樓面地價一萬三千六投得啟德地皮，微妙之處係較佢上月初買入嗰幅啟德地僅僅高出一百，從海航呢個出價，好明顯係上次佢嚴重估錯，今次焗住要死頂。
海航上月買入啟德地時，除咗佢自以為好醒外，全世界都覺得勁貴，市場更有風話最高出價都唔夠一萬，若然今次塊地俾第二個發展商投得，個價又大大低於萬三蚊，即係話上月海航投得塊地唔值咁高價，咁佢就有麻煩。
押股借錢買地
雖然市場有人話大陸佬大把錢冇所謂，但實情唔係咁，若有留意新聞，海航將香港間上市公司海航實業（0521）嘅股份押咗嚟借錢，倘若佢真係咁有水，又使乜押股？
問題嚟喇，通常押股後，貸方會要求啲抵押品價值唔能夠低於某個價，若然低過，馬上要補倉，唔補就斬。Loser唔知海航除咗押股外有冇押地，如果今次啟德塊地嚴重低於上次價格，上次塊地估值肯定大跌，若有押地，隨時要補價；即使押股，都好有可能受影響。於是乎佢哋今次只好侷住以高價再搶，仲像徵式每呎樓面地價高一百蚊。
正常去諗，政府早前先出辣招打壓樓價，樓市亦靜咗落嚟，啲本港地產股更加跌咗一成；加上特朗普獲選總統後加息之聲高唱入雲，啟德塊地唔應該仲貴過上次，畢竟市場環境改變，個價應有所調整。
今次又搵乜嘢押
再講，若然海航上次出價咁準，市場係認同嘅話，照理今次落標啲地產商都會勇進追價競逐，但好明顯佢哋出價都係好保守，結果又係海航投得，咁大家就知市場根本唔相信幾年後啟德樓價可以大升。
美聯儲局主席耶倫早前先話明年加息三次，中國政府又話要壓樓價，打擊炒賣，在在對樓市都唔利好，樓價即使唔跌，想升都唔容易，更加唔好講大升，海航呢舖肯定輸多贏少。
唔好忘記，上次塊地就押咗上市公司5成有多股權，今次買地又搵乜嘢去押呢？