唔知各位讀者身邊多唔多朋友炒股，近一兩個星期有一個非常明顯嘅現象，就係多咗好多人中咗「Number降」。所謂「Number降」，即係人地噏一個股票Number，你就中咗降頭咁嘅唔知點解會即時入咗隻股，連隻股係做咩、PB、PE幾多都唔理，就衝入去買。
馬暈初初炒股票，都經歷過中「Number降」嘅時期，就算到依家，亦未有呢隻降嘅抗體，只不過係股齡增加就更加識得進退，預計一筆「Total Loss」都入唔到肉嘅資金去中降頭，雖然賺唔到大錢，但最緊要係風險可控。
身邊真係唔少朋友都中咗降，嚴重嘅程度係，近一個星期，我每日都收到不同人提供Number，更可能係同一個Number，由兩個分別來自不同朋友圈嘅人畀。當然，呢班朋友對Number都係唔知頭唔知路，問親佢地係咩來頭都係得到同一個答案：「只要信、不要問」。
好多人喺細價股熱潮中呢隻降頭都係會輸得大大煲，無他嘅，因為頭幾個你收到嘅Number你會抱懷疑嘅態度，唔敢買，到你發現十大升幅榜上出現一啲你似層相識嘅號碼、但你係無買過嘅號碼，你就開始「揼春」。之後你會當畀Number你嘅朋友係股神，開始中降頭跟買，但往往跟買嘅時候已經係水尾，好多時都由炒家變用家，即係最後接貨嗰個。
噚日個市跌三百幾點，但唔少細價股都跌，搞到九成股份係跌住收市，呢個係第一次響起警號。雖然我個人覺得細價股呢轉未炒完，但距離Game Over已經愈來愈近，依家係時候收割，尾水由得其他人博就算喇！