歐國盃下線8強早被認定易打，當中「三獅」繼續奉行魚生粥政策，已連續5場國際賽冇失波；但主帥修夫基領軍下，表現太保守，主力潛藏未盡發揮，王牌前鋒哈利卡尼狀態一般。反而今晚佢哋嘅對手德國，分組賽已兩度逼出超強鬥心，更利打淘汰賽，亦唔會怕作客溫布萊；呢場波計90分鐘客軍坐和望贏，而外界認定「英德戰」勝方，入決賽呼聲極高喎。
今晚尾場瑞典鬥烏克蘭兩支「黃衫軍」冇乜人提，其實瑞典近年表現比另一北歐隊「丹麥」更穩定，連續6屆入歐國盃決賽周，上屆世盃入到8強輸俾英格蘭；今屆分組賽悶和西班牙，又攻陷波蘭。只不過冇「神鋒」伊巴謙莫域，星味更淡，但老到隊長中場施巴斯坦拿臣打足3場、後上殺手科斯貝治長期有貨交、祖記新星古路施夫斯基已交出兩助攻，仲有老牌殺手馬古斯貝治候命，唔會怕表現欠穩嘅烏克蘭。歐國盃屆屆有驚喜，「英德」喺下線當然惡，如果瑞典殺到入4強鬥到丹麥，呢個北歐童話比1992年丹麥封王更夢幻。