肥唔係罪，但輸波又被人身攻擊，拖「肥」糖暫代領隊安斯禾夫男人最痛。英超已激烈到容不下自己友，翻查第一屆英超22隊，清一色自己友玩晒，單係英格蘭領隊有16人，蘇格蘭有4人。自從阿根廷嘅阿迪尼斯掌管熱刺，打開缺口之後，如今走過四分一世紀，冇一位「英人」幫手攞過英超冠軍，依家20支英超增加番到5位英格蘭波士；蘇格蘭人走清，球迷只會記得永垂不朽嘅費爵爺。
炒咗肥佬朗奴高文，愛華頓搵教緊隊內U23嘅另一大肥佬、土炮安斯禾夫頂檔。身形從來唔係才華嘅首要考慮，但係睇佢排陣鬥李斯特城，真係眼冤，唔係老餅就係幼齒。老餅艾殊利威廉斯又肥又鈍，成場波頂唔贏一次頭槌；佢用咗唔少自己喺U23嘅親兵，包括後生仔莊祖簡尼，結果解圍撻Q擺烏龍。球季只過五分一，隊波簽入嘅大量重磅新兵，剩番朗尼同門將比克福特呢場擔正，賽後祖爾巴頓狠插「肥安」只適合做體育老師，刻薄但非無道理。愛華頓禮拜四喺歐霸盃作客里昂，為咗保命，還是全速棄盃，搵個外國名帥救亡，方為上策。