熱刺要獎賞靠自己
來屆歐聯玩擴大，分組賽32隊增至36隊，其中兩個額外獎賞席位，送俾今屆喺歐洲賽事表現最好嘅兩個國家；英超內耗嚴重，8強首回合過後，英超隊3大盃賽5路興兵，只得維拉主場贏波。根據Opta Analyst分析，原本系數排榜首兩國「意、英」來季多奪一個席位機會分別係94.9%及82.5%；8強首回合賽後變成99.8%及57.8%，排緊第3嘅德甲喺利華、拜仁同多蒙特同佔先機下，急升至41.8%。英超歐戰告急，隨時累熱刺，做唔成「造王者」外，隨時跌落歐霸甚至歐協聯。
維拉無懼兼顧兩線，啱啱「雙殺」阿仙奴，爭4突變上風；熱刺餘下6場4鬥傳統Big Six勁敵，賽程極難踢，要重返闊別5屆嘅歐聯，唯有靠自己爭氣。其實唔係車路士同曼聯更不濟、紐卡素兼顧唔到歐聯，一早打殘自己，對上10場英超作客只贏2場嘅熱刺，唔會仲有「坐五望四」嘅優勢；防線長期不穩係主因，阿根廷世盃功臣中堅基斯甸羅美路名大於實，孫興民今屆改打箭頭唔係佢強項，仲踢唔返歐聯，唔會有好手肯加盟，惡性循環，只會拖慢重建時間表。