盧卡古
世上冇幾個曠世奇才艾寧夏蘭特，曼城簽到又識用。相反，喺最高水平英超嘅「9號位」球員運氣多數麻麻，上屆季初加盟狼隊嘅奧地利高人中鋒沙沙卡拉積，地標戰踢咗半場就十字韌帶重創，唞足一季。「耶穌仔」世盃帶傷返嚟休息數月，係阿仙奴衰收尾未能帶返終點嘅主因之一、賓福特王牌艾雲東尼衰賭波，坐越季波監到下年年初、技術全面表現無私嘅羅拔圖法明奴，喺紅軍不受重用，揀沙特搵尾水肥約。就算勁到「三獅」哈利卡尼，上屆入球仲僅次夏蘭特，長期留戀熱刺，大家都冇將來，唔知為乜？
英超近屆嘅降班隊，絕大部分喺火力最差嗰幾隊，曾喺呢度攻入逾120個英超入波嘅「魔獸」盧卡古，如今淪為車仔棄卒只一心想踢走，又係國米眼中嘅反骨仔。仲癡戀意甲行軍速度慢自身會有優勢？貪圖沙特人工？30歲嘅「魔獸」踢大賽敗家出名，但以佢喺「9號位」嘅級數打簡單足球，識用仲好有用。車仔喺轉會市場亂晒龍，英超行家財力夠要保命符，借「魔獸」孭起佢份人工，諗得過！