達雲仔再鬥夏蘭特
達雲紐尼斯「返嚟」，成就紅軍經典戰勇擒紐卡素，俾足12個月呢位1億歐元轉會費嘅烏拉圭球星，適應世上最高水平聯賽英超，波士高普有耐性又有牙力，相信「夏蘭特大戰紐尼斯」呢個話題，有機會再成今屆英超爭霸重點。
今屆英超列強暑假熱買防中，上屆同期係搶前鋒；睇返傳統Big Six上屆夏天轉會窗最貴價嘅3單收購，暫時失敗居多，好似紅軍順序最貴係紐尼斯、法比奧卡華路同加雲藍斯，紅軍上屆失敗，同季初買人好有關係。再睇返其餘5強同期嘅最貴收購係艾寧夏蘭特、加比爾捷西斯、韋斯利科芬拿、安東尼同李察利臣，top pick同戰績差唔多成正比。不過潛藏優厚嘅年輕球員有機會出場，經過一個暑假大幅進步唔意外，好似上屆列強嘅貴價貨、阿仙奴嘅法比奧韋拉、熱刺比素馬今屆值得留意。達雲仔踢法唔似加盟後即熱爆英超嘅夏蘭特，活動範圍更廣，打突擊拿手；踢法較柔嘅另一鋒將加普可攻歐洲賽，開竅嘅達雲仔配沙拿同路易斯戴亞斯做紅軍三叉戟，先係曼城爭霸嘅大患。