點止行街咁簡單

大家有冇諗過將運動融入日常生活其實係非常簡單？步行係一種非常簡單同埋安全嘅運動，即使你非常忙冇時間做傳統嘅運動，你一定會有時間行路。由你平日行路返工到行路往返不同場地，其實每一日你都可以進行最少30分鐘嘅步行。

急步行作為運動嘅方法簡單，大約每分鐘行100步就可以達到。我哋可以利用兩種方法去監察自己有無達到急步行嘅運動量。第一，資訊科技發達，好多智能手錶都可以監察我哋嘅心跳。如果我哋能夠持續30分鐘達到中強度運動，即約65%最高心跳率(220減年齡)，就算達標。第二，我哋可以用談話測試嚟決定是否達到中等強度。如果你急步行時呼吸稍為加快，能夠說話但難以唱歌，咁你嘅運動強度就適合了。

現時，有一個由香港賽馬會策劃及捐助，並由香港基督教服務處推行嘅「賽馬會社工創新力量：點止行街咁簡單」計劃，目的係俾輕度智障人士同健全人士一齊透過喺市區行街嚟建立健康嘅生活模式。通過健行訓練、個人健康指導、運動體驗及飲食指導等，以好玩、有趣嘅方式，一步步令參加者實踐個人健康目標，亦令參加嘅輕度智障人士能夠走入社區，達致共融。計劃同嶺南大學跨學科學院合作，令修讀運動教練學及盛事管理嘅同學獲得實習機會。

運動其實好容易，只要能夠與生活結合，話咁快就已經達標。

作者為中國香港運動醫學及科學學會副會長、嶺南大學跨學科學院高級講師莫鑑明博士、賽馬會創新社工夥伴兼香港基督教服務處多元文化、復康及社區服務協調主任胡淑瑩