![許志安 鄭秀文 Sammi](https://cdn.am730.com.hk/s3fs-public/styles/article_image/public/2024-07/18-01_12.jpg?itok=hjBLBTCL)
許志安驚喜登場,與Sammi合唱《世紀末煙花》。(林俊源攝)
由幾時開始演唱會會/要有嘉賓?演唱會歌手邀請嘉賓究竟有咩用呢?我覺得當中嘅動機同類別可以細分為以下幾類。
第一類係帶新人:例如五月天嘅演唱會,開場時都會有暖場嘉賓,大多都係五月天旗下一啲新樂團或者歌手,用舊人嘅名氣,將新人帶俾觀眾,呢一類嘉賓邀請,係一種商業嘅計算,有時出自歌手背後公司,有時出自歌手本身。
第二類係歌手本身好朋友嘅邀請︰有幾個好受歡迎嘅男歌手,可以話係演唱會嘉賓「常客」,共通點係佢哋形象正面,冇乜負面新聞。邀請佢哋做嘉賓,想表達嘅係一種友誼,或者亦係反映佢哋喺行內受歡迎嘅程度。演唱會,係睇表演嘅;友誼,又冇話唔可以係表演項目之一,只要觀眾覺得嘉賓同歌手嘅友誼感人。演唱會從來唔只演唱,當然,同唱歌一樣,真唱定假唱,我哋可能分唔清,或者心底裡根本從來唔想分清。
換個角度,歌手又點解要去做演唱會嘉賓呢?大部分都唔會有酬勞,連埋彩排時間,對一個歌手來講都有成本,可以話係一種投資。當然你可以話係對朋友嘅支持,但發個短訊,背後打氣其實都一樣得,點解要喺台上對住萬幾人表現兩個人之間嘅友誼?有啲歌手,仲會喺呢啲時候,特登講一啲聽起上嚟非常非常私人嘅小故事,感恩又溫馨。入場嘅觀眾又會覺得嗰一場好特別,分分鐘對嘉賓改觀甚至圈到粉;片段亦會喺網上廣傳,幫嘉賓軟性宣傳;咁睇對所有人都冇乜傷害,係多贏局面。
我冇做過正式統計,但係感覺上,香港以至華人嘅演唱會嘉賓,一般比歐美日韓等外國歌手多。我哋一方面想人哋尊重我哋係一個歌手,呢個係一個樂壇。一方面我哋又不停話俾大家聽,我賣嘅唔只係唱歌。係幾時開始,我哋自己將演唱會,變成演、唱會?
當然,凡事有例外,最近鄭秀文演唱會邀請咗佢嘅丈夫許志安做嘉賓,呢個係我真心覺得與別不同嘅邀請。係,佢唔只係唱歌,但有乜嘢場合更好表達一種人性嘅光輝。呢種光輝,叫做寬恕。