當UNi出道 COLLAR出EP

香港樂壇近年出現女團潮，百花齊放當然係好事，但見到最近出道嘅UNi，令我不禁想問娛樂圈班話事人，究竟知唔知自己做緊乜？但過咗幾日，我聽到另一強烈反差嘅消息：COLLAR宣布會兩個禮拜內出5首歌，做一隻有主題嘅EP，再接一個演唱會。之前有粉絲批評COLLAR出極少團歌，原來佢哋係做緊一個大project，我覺得有兩點值得留意：

一) 原來仲有人有心有力有遠見有planning。做概念EP，5首歌有關聯得來又各有特色，聽講仲飛咗去外地拍MV，5首歌嘅MV都要有故事，帶出EP嘅概念，唔止要有心，仲要有財力同努力，最重要有長遠vision，極有誠意先可以做到。每一個環節都唔容易，加上有7個女仔，製作需時，投放力量大，而又未必成功。喺現今短片文化嘅世界，肯做而又做到，真心佩服。足證公司、幕後、7個女仔都付出好多。

二) 有勇氣唔跟遊戲規則。香港歌手出歌嘅時間同頻率，好多時都係根據年尾頒獎禮成績去決定。最穩陣就係每季出一首歌，增加整體嘅播放率，頒獎禮就容易有好成績。到10月尾先出一隻EP，兩個禮拜出5首歌，電台根本播唔切，即係話用5首歌嘅資源，換來嘅播放率或者攞獎機會，同一首歌冇乜分別。我覺得係反映佢哋重視真正樂迷多過獎項。近年好多人都開始質疑，獎項係咪仲咁重要呢？但最終大部分人都會跟隨一直嘅所謂遊戲規則，而冇人會反思，其實最重要嘅應該係聽眾嘅感受。COLLAR呢隻EP，我覺得係一種尊重觀眾嘅勇氣。

5首歌、一張EP、一個演唱會，成件事好完整，係一封難得俾聽眾嘅情書。女團組合當然係sell美麗，但我覺得COLLAR一直以來，尤其係今次，示範咗一種，短裙同filter以外嘅美麗，話俾大家知其實都可以美麗in your way。佢哋真係揀咗一條好難行，但係好值得行嘅路。