近年由《飯戲攻心》到《毒舌大狀》以至近期《九龍城寨》，都令人覺得香港電影業回春。點知近日兩套卡士同口碑都唔錯嘅《破．地獄》同《焚城》，要出動到套票捆綁式特價銷售。兩間電影公司肯合作值得讚揚，但同時亦反映大家對票房缺乏信心。
點解香港電影喺幾年間咁大起大落呢？經濟及行業青黃不接等因素，大家都講咗好多，今次我想講一個較少人提及而又好關鍵嘅角度：獨沽一味。唔係講緊作品，而係觀眾嘅讚美相對單一，從而直接影響電影多元發展嘅空間。唔係要觀眾乜都「讚」，重點係「點樣讚」。
1. 呢幾年受歡迎嘅電影，共通點係內容有香港情懷，容易引起共鳴，咁並唔係問題，但我哋同時要識欣賞(或批判)不同口味嘅港產片，讓唔同類型嘅故事同導演有得發揮。電影業要有許鞍華嘅情懷、王家衛嘅藝術、周星馳嘅搞笑、杜琪峯嘅人性等等，否則由傳承甚至海外發展都有掣肘。任何類型電影都有周期，唔能夠只靠一種類型，要繼續壯大，就要觀眾識得「點樣讚」 。
2. 以前我哋成日笑韓劇，來來去去都係絕症慘情戲，但只要俾空間，而家就有科幻、復仇、浪漫、警匪多元題材，當中可以注入炸雞同部隊鍋等本土元素；但如果要行業健康發展，就必須要有海外市場，亦都即係要有本地情懷以外嘅元素。就好似《魷魚遊戲》會講階級觀念貧富懸殊，有普世價值，先能夠造就普及嘅經濟，從而生存。
3. 唔好盲讚，幾好睇嘅電影都可以有缺點。即使票房高嘅幾套作品，劇本、人物都一定有改善空間。若果因為某人而決定鍾唔鍾意，咁唔係judge by quality 係judge by persons。
最後我想講，要識點樣讚，唔好獨沽一味，就係唔好信晒網上評論，自己入場再讚或者彈，先係最重要嘅。無論拍得好定唔好，幾廿蚊張飛都只係一程的士嘅消費，套戲衰極最多激氣，起碼唔會受氣。