![MIRROR中最聰明的人](https://cdn.am730.com.hk/s3fs-public/styles/article_image/public/2024-07/22-01_1.jpg?itok=MHFRVni6)
MIRROR中最聰明的人
MIRROR嘅Ian(陳卓賢),一連7場嘅個唱即將開鑼,亦宣布咗網上直播場次。有別於其他演唱會揀尾場直播,貪氣氛好啲,Ian就揀咗第3場做直播,引起fans關注,亦令我覺得,Ian果然係娛樂圈最聰明嘅藝人之一。
對於Ian唔揀尾場直播,根據我八返嚟嘅消息,主辦當然知道最後一場氣氛一定最好,最多人想睇,但原來監製同歌手都擔心,唱到第7場把聲可能冇咁好,尤其是網上直播聲音好突出,但頭兩場又難免會有瑕疵。所以監製同歌手都知道第3、4場表現會係最穩定,就強烈建議呢個安排,難得主辦亦都體諒同接納。呢個決定反映出歌手唔只識得從自己角度思考,更加會從市場同觀眾角度睇。唔好以為個個都會咁,好多藝人都只識諗點樣釋放及輸出,對市場嘅觸覺唔夠敏感;會多角度思考嘅藝人確係唔多,所以話Ian確係聰明。
Ian一直保持低調,專注音樂,雖然可以話呢啲係性格,同聰明與否無關。舉多個例子,其實 Ian出道初期傳過唔少緋聞,到而家幾乎冇晒,不外乎幾個可能性︰之前啲嘢全部係傳媒老作,突然又唔作;或者男主角突然修心養性,乜都冇做咪冇緋聞;仲一個可能就係男主角學精咗,更懂得點樣做咗唔俾人知,或者有人知都唔俾消息流轉。我要強調,以上純粹用邏輯推斷,無論邊個係真,識得為事業而修心養性,或者懂得影響輿論,結論都係:聰明咗啦。
即使唔講行內傳聞,有留意Ian IG都知佢對服裝時尚及汽車嘅觸覺愈嚟愈有品味,仲唔只係鍾意,更加可以擁有,印證小道消息話Ian投資理財方面相當投入及獨具慧眼,斬獲豐富。一個唔單止懂表演,仲懂輿論風向,更識得投資嘅人,可以話係一個全方位聰明絕頂嘅藝人。