上回提到原來好多人都唔夠愛自己，我明白係點，因為我細個啲嘅時候都試過。人唔夠愛自己可以慢慢學，但如果另一個人唔愛你就基本上好難靠外力去改變了。
如果佢夠愛你，佢唔會同其他人玩曖昧，比你周到仲堅稱係朋友，然後賴你屈佢。如果佢夠愛你，就算佢部電話真係好快冇電，佢都會帶定充電喺身，有要事覆唔到前會講聲，只怕你會擔心。如果佢夠愛你，佢唔會等你發完脾氣、眼淚留到乾晒，再死死地氣自己走去氹返佢，只因為佢知你會。如果佢夠愛你，佢唔會做完啲自己都解釋唔到嘅事，然後話你有疑心病。如果佢夠愛你，佢唔會明知你介意都follow埋啲性感女模IG，follow都算，仲要like。如果佢夠愛你，佢唔會鍾意就逗下你，自己心情唔好就羞辱你，你永遠唔會知道下一秒將會發生咩事。如果佢夠愛你，佢唔會講親結婚都抓狂。就算係不婚主義，都至少可以開心見誠咁拎出嚟討論。如果佢夠愛你，佢唔會將你收收埋埋唔俾班朋友見，而係恨不得俾全世界見識下佢女朋友有幾好。如果佢夠愛你，你自然會知道。
偏偏人有時就係太識自欺欺人，就算心知肚明係一段關係唔適合，都會不斷游說自己，將所有事情合理化。身邊朋友三番四次苦口婆心勸告，明知佢哋係啱都仍然唔打算面對。撫心自問，你覺得佢真係愛你嗎？
一段關係嘅失敗並唔代表你嘅失敗，反而離開一段失敗嘅關係先係邁向成功嘅第一步。我明白係好唔容易，但早日看清係好事啊！
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐
ig：sis3ter