家中有養貓，最近一到半夜就聽到貓喺客廳砰碐磅硠。每次伸頭出房外張望，都只見貓對住空無一物嘅牆角指手畫腳、喵喵叫，場面甚為嚇人。自己大驚小怪，嚇到呢幾晚都幾乎唔敢熄燈瞓覺。最近一次貓咪又喺半夜作怪時，我決定鼓起勇氣衝出房、開晒全屋嘅燈望個究竟。就喺我緊張到就快崩潰時，發現咗呢名身形極細小嘅訪客——衣魚。佢拖住一身半透明史前生物嘅造型，施施然喺貓咪同我嘅面前行過。
衣魚，又名silverfish(學名：Lepisma saccharina)，俗稱蠹、蠹魚、白魚、壁魚、赤木蟲、書蟲或衣蟲。喺人居住嘅地方唔難見到衣魚，佢哋喜歡潮濕溫暖嘅環境，而且怕光，所以多數喺夜晚出沒。衣魚以咬食紡織品、紙質物品，纖維等等維生。雖然衣魚嘅行為並唔討好，外表又看似害蟲，但其實佢對人類係無害㗎。
衣魚一般能夠有好幾年壽命，而且繁殖量驚人，所以要好好處理。防治嘅方法有好多，例如樟腦丸、香薰精油嘅氣味都會令衣魚唔敢靠近，不過家中有養寵物嘅人就要小心，免得寵物誤食香料中毒。另外最直接嘅方法就係定時整理家中書本雜物、衣物等等，嚟一場斷捨離。另外，最有效嘅方法就係除濕，唔止能夠防治衣魚，自己都住得舒服啲。
同唔少鄰居傾過，原來最近大家家中同樣發現衣魚。聽講好多新起嘅住宅都有相同問題，尤其轉天氣時問題就更顯嚴重。個人覺得衣魚非常恐怖，但諗深一層，衣魚總比想像中嘅不速之客好。今次都總算鬆一口氣！
一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig：sis3ter