女性能頂半邊天，Ray早前應邀出席由新城財經台同香港中小型企業聯合會合辦嘅《大灣區傑出女企業家獎2018》啟動禮，就見到唔少傑出女企業家，佢地嘅成就絕對唔會比男性低。而呢個獎項就係為咗表揚一班於商業上成就非凡，而且為大灣區發展貢獻良多嘅「女強人」。
獎項以「剛柔並濟，發揮優勢，齊創大灣芳華盛世」做主題，除咗新城同中小企聯合會之外，仲有香港貿易發展局同香港生產力促進局協辦，同埋仲有泰禾人壽嘅全力贊助，與及國際女企業家協會嘅全力支持。新城廣播有限公司董事總經理宋文禧表示，香港商家其實早已前往所謂9+2嘅大灣區發展業務，當中不乏女性於大灣區內創業或傳承家族企業，對經濟及就業有好大貢獻，獎項除咗可以表揚佢地之外，仲希望可以一直傳承落去，刺激更多女性去大灣區發展。當然，亦希望各界行動，提名傑出的女企業家參與活動。
香港中小型企業聯合會會長麥美儀介紹話，獎項分3個類別，即「傑出女企業家」、「傑出家族企業女企業家」，同埋「傑出青年女企業家」，當中青年女企業家獎嘅參加者必須係45歲以下，接受提名至9月30號截止。而評審團會就參選人於企業成就、業界影響、大灣區發展貢獻、公益責任同埋個人誠信五大元素去評選傑出女企業家。仲有三個星期，阿Ray都要諗吓提名邊位傑出嘅女企業家參選。