新聞報道：「因應有長者接連發生脆性骨折，當局昨日圍封臨靜邨悅鵝樓，為65歲及以上長者作骨質密度檢測，最終發現近三分一屬無症狀的骨質疏鬆患者。有專家提醒，過去3年長者留家抗疫，缺少運動和接觸陽光，令體內鈣質加速流失，因此骨骼對跣倒等家居意外的抵抗力明顯下降。」
「媽，阿爺入咗院成兩個禮拜喇，唔知佢做完髖關節骨折手術未，幾時先行得返呢？」坐在電視機前的孫仔問。「唉！而家公院唔俾家屬探病，佢入院時又驗到新冠病毒陽性，骨科醫生話要等有負壓手術室先做得，又話CT值大過幾多麻醉科醫生先同意做。」林家嫂應道。
「我上網睇過，話長者一旦髖關節骨折，最好喺入院48鐘頭內做手術。如果瞓喺病床躺平等得太耐，會增加併發症風險，例如吸入性肺炎、深層靜脈栓塞同壓瘡。但最慘嘅係，原來有差唔多五分一長者，會喺髖關節骨折後嘅頭一年內因病離世。」「聽你咁講，死亡率咪仲高過感染新冠？」「兩種病又唔可以直接比較，但最近有外國研究話，感染新冠嘅髖關節骨折病人，術後30日死亡率，比起無感染嘅骨折者高7倍㗎！」
林家嫂聽後摸一摸手肘，說：「舊年我先至手踭輕微骨折，好彩唔使做手術。但隔籬屋鄭師奶，幾年前去外國旅行跌親，結果手腕骨折要開刀鑲鋼片。」「其實你哋呢啲五、六十歲、停咗經嘅女士，日日匿喺熱廚房不食人間煙火，又知唔知點去預防骨質疏鬆呢？聽醫生話，脆性骨折好似新冠疫情咁，一生中都有好幾波。第一波係五、六十歲嘅手腕骨折，第二波係六、七十歲起嘅脊椎骨折，第三波係七、八十歲左右嘅髖關節骨折。如果第一波骨折後，唔及早做檢測，恐怕出現下一波骨折都係遲早嘅事。」
此時，電視又播放預防骨質疏鬆的宣傳片：「呢個年紀，患咗疏鬆，跌倒骨折，咪重大件事！一定要預防，可以去飲茶，見到Soon(孫)仔，哈哈！」
(註：故事中圍封強驗骨質疏鬆乃虛構情節，至今政府仍未贊成推行長者骨質疏鬆篩查。)
作者為骨科專科醫生