韓國天后宣美，即將來港開騷。
ViuTV嘅《CHILL CLUB》同日本YouTube頻道《THE FIRST TAKE》將會合作搞選秀節目，參賽者會挑戰一鏡到底嘅現場演出，贏咗就有機會上《THE FIRST TAKE》真正唱出國際。
我見網民反應極度正面，有日本文化page仲以「震撼大消息」來形容呢件事。確實，當香港歌手都冇幾多個上到《THE FIRST TAKE》時，今次直情做埋合作單位，推個素人上去唱出國際，實在係幾勁。香港人成日講返廣東歌同港產片以前幾咁勁，但懷緬嘅多，真正實踐將香港同國際接軌嘅少。其實今次只係一個較大里程碑，ViuTV同Makerville 一直以來都秉持「向世界出發」精神：
1) 姜濤、Anson Lo同Stanely一早就參演台劇，《第三佈局塵沙惑》仲喺HBO上架。
2) 姜濤、Anson Lo、Jer同Jeremy 2023年就上過《THE FIRST TAKE》，兩個Jer仲二刷。
3) MIRROR推出英文歌，當中《Day 0》 同NBA球星Dame D.O.L.L.A合作，MV都由荷李活著名導演操刀，世巡期間仲上咗FOX 5 New York同CNN 訪問。
4) Edan、Stanley同姜濤去美國睇NBA，仲安排佢哋上埋官方平台。
5) MIRROR成員不斷同世界各地嘅歌手合作︰Jer X 台灣嘅楊乃文、AK X 日本嘅高瀨統也、Anson Lo X Jeremy X韓國天后宣美等。
6) 電視劇《二月廿九》賣到去印度Amazon。
7) 《CHILL CLUB頒獎禮》每年都搵海外表演單位︰日本、泰國、越南等代表，上年仲有Taylor swift 都鍾意嘅英國年輕歌手Griff。
8) 《CHILL CLUB》上個月喺啟德體育園搞咗個港泰音樂會，好多泰國天王天后來參與。
9) Marf＠COLLAR將會做英國天團Coldplay巡唱香港站嘅嘉賓。
10) 今年Ian＠MIRROR世巡開拓澳洲站。
齋憑記憶都數到以上例子，仲未計大大小小海外活動、時裝周，劇集本身又喺東南亞同美加播放，仲有姊妹公司「黃Viu」喺東南亞同中東超過6千萬用戶。佢哋公司一直都透過不同網絡將藝人及產品推送海外，成績有待驗證，但起碼做到堅持，由個人、團隊、內容、音樂，幾乎所有部分都會嘗試。寫到呢度，又會有人覺得係鱔稿，大家有時間猜疑，不如都用啲時間思考下，既然一個相對年輕嘅公司都咁努力衝出國際，香港娛樂圈好多大佬公司，係咪都應該將資源投放於拓展香港文化，而非只糾纏於籠裏雞自己人鬥自己人呢？