啟德小泰國
啟德體育園首場測試演唱會，ViuTV嘅《CHILL CLUB》搞咗個港泰音樂會，事後外界對場館同演出都有唔少討論。但我覺得講明係測試，就一定係有嘢可以做好啲，令我關注嘅反而係︰有幾多觀眾之後會follow呢啲泰國歌手？
泰國表演單位之中，令我最深刻嘅唔係勁歌熱舞男團ATLAS，而係唱歌超勁、又有幽默感嘅中佬D Gerrard，大家搵搵佢IG，有60幾萬followers，再睇埋佢啲相，就會發現佢有型又有魅力，我諗唔到任何香港藝人係呢種style。
同Anson Lo合唱嘅Jeff Satur都令我好深印象，靚仔身型好、識講嘢、妖豔中帶點sexy，唱歌又好聽。幻想係阿Jer嘅唱功、Anson Lo嘅舞技同Jeremy嘅妖豔集於一身。另外，香港歌手跳舞歌一定會有一大堆dancers，Jeff就快慢歌都可以一個人壓得住個場，實際角度來講，成本可以想像爭幾遠。
我好佩服主辦搵呢班泰國歌手來港嘅勇氣，第一，佢哋唔會有叫座力，香港班粉絲仲可能會驚個騷好悶。第二，同香港歌手同場，有被比較嘅風險。冇比較雖然冇傷害，但冇比較亦會冇進步，勇於面對先係正確態度。(我要讚下好多香港歌手都努力學泰文交流，但Ian＠MIRROR係唯一有solo而冇同其他人crossover，上次演唱會已經係咁，我有啲好奇。)喺以上兩個情況下，主辦單位仍然搞呢個音樂會，我覺得亦係平台應該有嘅態度。
雖然今時今日各個串流平台，撳個掣就可以聽到世界各地嘅音樂，科技帶嚟方便，但亦令人選擇留喺舒適圈。聽歌都係，大家其實聽嚟聽去都係幾種，而作為大眾傳媒，引進一啲未被廣大市民認知嘅音樂或文化係重要功能，shape the taste，行業先至會慢慢百花齊放同有生命力。
成個音樂會，泰國歌手不止10次叫大家「make some noise」，因為台上勁歌熱舞，台下鴉雀無聲。我相信香港人其實有部分人係願意進步嘅，台下五千人當中一定有幾個人，即場搵下班泰國歌手嘅背景同歌曲。每一次演出，每一個節目，慢慢地，只要有主辦方肯堅持，總會得到更多觀眾接受唔同類型嘅音樂，香港總會同世界接到軌。