論演出角色的層次，衛詩雅是5位女角中最好。
《金像獎》提名名單啱啱出爐，以下係根據遊戲規則嘅預測，並無注入個人情感。唔係討論應唔應該攞，而係有冇得攞。
最佳電影︰由《九龍城寨之圍城》、《爸爸》、《看我今天怎麼說》、《破．地獄》同《從今以後》競逐。一睇就知係《九龍城寨》同《破．地獄》之爭，兩套票房都破億、口碑又好，最後投票關鍵就係睇公司啦。《破．地獄》係英皇娛樂，《九龍城寨》就係天下一、寰亞、無限動力等等，而天下一有另一套提名《看我今天怎麼說》。
投資者有冇院線亦係關鍵，《破．地獄》無論場次同聲勢都會有啲著數啩。公司嘅實力當然不相伯仲，但係拉票能力(即係行內人會俾面邊間公司多啲)《破．地獄》睇高一線。參考上年，《命案》攞咗最佳導演、最佳剪接同最佳編劇三個最重要嘅幕後大獎，最佳電影最後都輸咗俾安樂投資嘅《毒舌大狀》，有院線嘅投資者，明顯更有牙力。
最佳導演︰都係《九龍城寨》同《破．地獄》之爭，我睇好《九龍城寨》。因為鄭保瑞導演喺呢一行人緣好，大家亦樂見佢連續兩年冧莊，而英皇要幫較新嘅導演陳茂然爭獎仲有啲難度，另外三套入圍嘅亦都難攞夠票，同時俾個大獎《九龍城寨》亦合情合理。
最佳男主角：林峯、劉青雲、游學修、許冠文同郭富城之爭，首先最失望應該係黃子華，但同時亦顯示許冠文真係有好多人支持。因為同一套《破．地獄》，肯定有人投黃子華，但即使分薄咗票，許冠文先生一樣入到圍，所以佢絕對有力成最終贏家。不過係英皇投資嘅電影，可能將大部分精力為衛詩雅拉票，力捧佢做最佳女主角，未必咁用力推許冠文，所以林峯同劉青雲都係有機會嘅。
個人覺得演技有突破嘅林峯攞到會開心啲，但係唔排除有啲電影人仍然未完全接受到佢演技。至於游學修應該會得到啲年輕評委票，但如無意外都應該係少數。呢刻要落注，我會估係許冠文。
最佳女主角：根據現行遊戲規則及公司角力嘅現實，100%冇懸念：衛詩雅。完。