別想歪，我寫的就是字面意思。不知何時開始，多士漸厚，消受不了。
多士，方包切片烤烘，塗上油占奶醬，當然愈薄片愈香口鬆脆，即使中間帶些軟心煙韌，也應該恰到好處。自從台式吐司(其實一樣toast)流行，竟以厚為美，分量嚇人，唯一作用，大概比較飽肚吧。但食嘢食味道，今時今日誰還只求果腹呢？用膝蓋諗諗就明，舉凡月餅、餃子、咖央，哪一種不講究皮薄餡靚？多士變厚，等如配料佔比例變少，脆感變低，係定理。
做改良港式西餐的大廚向我們介紹他研發的蝦多士，甚麼都好，偏偏麵包厚疊疊，不再精緻小點了。朋友率直反映意見，大廚答：「諗住潮流興厚多士嘛。」我知我知，「厚多士」乃幾年前某新移民潑婦駡街「好多事」的諧音，網上瘋傳一時，卻值不值得肉麻當有趣呢？
另一違背初心的是Ｘ世代芝麻糊。你知道嗎？糊，米字部，加米叫糊，無加米叫露，所以合桃露、杏仁露係露，組合不同，磨芝麻配炒米方好吃，所以芝麻糊。後來，大家誤會溝了米呃秤搵笨，又嫌澱粉肥，唔臭米氣，遂改為芝麻露，或冒充芝麻糊之名，名不副實。即所謂新派糖水也。
多士要薄才脆，芝麻糊要有米才香，是經驗累積、到目前為止難以動搖的合理烹製法。你笑我老土也罷，食落口，得失寸心知，畢竟別盲從潮流。