汪氏母子
大S徐熙媛喺日本因流感併發肺炎逝世，係過去一星期熱話，流感病毒短時間內奪走一個人嘅生命固然恐怖，而事件引起嘅輿論操作，亦都令人心寒。
大S前夫汪小菲喺大S病逝後一直係傳媒焦點，又飛去台灣、上演「雨中下跪」，仲留言喺大S舊片度話「老婆我很想你」。呢啲短片同報道樓下都會有一大堆人留言，讚「汪小菲好深情」、「二人唔離婚就冇事」、仲批評「大S老公具俊曄照顧得唔好先發生咁嘅事」云云，汪小菲「深情前夫」嘅形象一度喺網絡世界中廣傳。彷彿冇人記得兩人離婚後，汪小菲嘅一連串動作；亦冇人會質疑明明大S遺體同佢哋兩個仔女都仲喺日本，汪小菲究竟為咩要立即飛去台灣？
直至之後傳出汪小菲包機帶大S骨灰返台灣，終於令到喺悲痛中嘅徐家出聲明澄清，甚至連包機公司都睇唔過眼幫手證實，以正視聽。風向一轉，大家突然好似被叫醒咗咁，覺得汪小菲兩母子不斷散播謠言同埋炒作，仲懷疑佢哋出錢請網軍(網民戲稱為「汪汪隊」)加入撥火。最後連抖音都出手，無限期封閉張蘭與汪小菲抖音帳號，公開話佢哋違背道德底線。
呢個結局唔少人都形容係「大快人心」，但當中有幾多人其實曾經同情過「深情前夫」？甚至有被引導過思考兩個人唔離婚，大S係唔係就會更幸福嘅呢個方向？今次有人頂住傷痛、正面反駁，仲要本身單新聞夠大、夠多人關注先至令到真相可以傳送俾多數人，令到大部分人醒覺，但其實呢種情況並唔常見。
用謠言帶風向呢招喺娛樂圈其實每日都發生緊，有圈中人同我講，仲難應付過以前啲娛樂版亂咁寫。因為一個傳媒亂報一個消息，你可以立即澄清，其他傳媒都會好樂意幫你一齊反駁對手；但今時今日係好多網軍亂講好多消息，都唔知可以澄清邊個，亦都澄清唔到咁多。而即使澄清咗，好多時候因為「網絡同溫層」嘅效應，大部分人無法接觸真相，相信嘅人就永遠相信。
聽講台灣嘅流感疫苗近日被「搶打」，謠言同網軍其實都謀殺咗好多人嘅人格，殺傷力不比病毒低，但又有咩方法對抗呢？