蛇年第一篇文章，本來想同大家分享一下我喺龍年睇嘅最後一個演唱會——ERROR《WHAT'S GOING WRONG??演唱會》，但計劃往往趕不上變化，ERROR呢個星期已有更多新聞，蓋過咗佢哋成軍6周年嘅演唱會。
先有擔任陳慧嫻演唱會嘉賓唱《跳舞街》，現場反應本來唔錯，陳慧嫻仲多謝ERROR介紹她俾年輕人識。但有傳媒就引述小紅書網民話唔識佢哋，形容係「廁所位」。我見唔少網民都幫口，覺得跨世代合作其實難得，唔鍾意可以唔睇之類。被人踩完有人撐返算唔錯，但保錡同阿叻一張合照就引起負評，仲有聲音叫佢退團。
其實ERROR演唱會當晚，保錡喺經典歌環節已經唱咗首《我至叻》，仲係當晚最high嘅其中一個環節，估唔到幾日後嘅合照引起咁多負評。先利申，我一直都幾欣賞ERROR，覺得佢哋喺香港樂壇有好獨特嘅角色，雖然行緊一條好似好偏門嘅路，但由「自肥」開始，到「死腳膠」，成功製造咗唔少話題。
而我最欣賞嘅係，雖然大家都形容佢哋係「騎呢組合」，但佢哋一直認真做音樂，無論係團歌定係solo，唔少都好優秀，MV亦見心思。而喺剛過去嘅演唱會入面，肥仔跳《墳P》、193嘅服裝、Dee哥嘅跳同保錡嘅跳，我見到每個人都好努力話俾大家知，佢哋除咗搞笑外，仲有好多值得大家留意嘅才華。
ERROR星途一直都如其名，間唔中就有啲挫折。193嘅言論、保錡嘅感情事、肥仔搞餐廳失敗等等。當中保錡出事率最高，仲一度停工，但公司冇放棄佢，鼓勵佢學音樂、練跑步，積極做人。而似乎每次挫折都令ERROR四子更認清隊友係真兄弟，團魂更強大，希望今次都係。
藝人有好多種，有啲一直穩穩陣陣，無風無浪；亦有人跌宕起伏，喺負評中成長，其實兩者都可以成功。謝霆鋒當年出道不斷被噓、被掟嘢，仲持續咗幾年，而當年佢被人噓住唱嘅歌，今日就成為大家嘅集體回憶，搶飛去睇。或者ERROR由改名當下，已注定條路唔易行，但相信堅持同團結，總有日會證明其實ERROR不錯。