喺呢個網絡成為主戰場嘅年代，各界別都會用網軍吹捧自己之餘打擊下對手，已經唔係咩新鮮事。但原來「打手」現形嘅時候，仍然會引起大家關注，仲成為近日粉絲界嘅網上熱話。
事緣有網民喺社交平台Thread封鎖一個經常攻擊COLLAR嘅帳戶W(代號而已自己上網搵真身)，發現咁樣同時會封鎖埋另外一堆帳戶。根據Thread嘅玩法，係因為呢堆帳戶同W都來自同一個管理人。網民仲搵到帳戶W發放嘅資訊，經常被另一個活躍於連登嘅帳戶極速轉載，而且行文幾乎相同，之後仲會有媒體緊貼報道。網民當然推測埋背後嘅big boss係咩單位啦，不過冇真憑實據嘅嘢，呢度就唔方便討論啦。
即使唔知道個源頭，今次網民揭發呢種由社交平台到討論區再去到媒體，可以話係「全方位抹黑群組」，肯定唔只得一個，亦都一定唔止針對COLLAR，當然更加唔會就此收手啦。不過，觀乎粉絲界嘅反應，我覺得有兩個覺悟值得高興。
1. 團結的覺悟：偶像已被人有組織地攻擊，粉絲們就應少啲內鬥，槍口對外，唔好被人分化。
2. 分辨是非：一件事由社交平台傳到討論區再被傳媒報道埋仲唔係事實？今次揭發嘅「抹黑群組」就話俾大家知，呢個只係幕後操作，唔係多人講就係事實。
有網民嘅覺悟甚至大到，發現喺剛過去嘅一個星期，突然有三單「緋聞」傳出：MC同KOL、洪嘉豪同Ivy@COLLAR、T-Ma同雲浩影。究竟係巧合，定係big boss發功？三連炮對咩人/單位最有利？呢啲都留返俾大家分析。
不過我覺得值得反思嘅係，當有人高調自認係小三，都會得到網民留言支持，呢個世界仲係唔係同十幾廿年前一樣，傳下歌手拍拖就會令佢哋出現脫粉潮，甚至冇得撈嘅年代呢？