王星失蹤的消息，被舒淇等藝人轉發，短時間內獲得龐大關注。
美國加州山火同內地男演員喺泰國被擄去緬甸，兩件事地理距離好遠，但有一個元素係完全吻合︰藝人成為焦點。
加州大火睇航拍相就覺得好恐怖，死傷人數不斷上升，數以十萬計人要疏散，好多人受影響。天災冇人想，亦冇得選擇，但點樣報道一單新聞，就係人為決定。幾乎所有媒體都係聚焦邊個荷李活巨星豪宅被燒毀、點樣逃亡等，無他嘅，都係因為要吸引眼球，以明星吸引受眾關注時事。或者好多人覺得，一個明星嘅豪宅受影響，比起眾多平民居所被燒毀，更有所謂嘅新聞價值。或者呢個先係人嘅本性(或劣性)，但任何生命都係平等，其實任何人受影響都值得關注。
另一邊廂，緬甸泰國一帶，呢幾年時不時傳出各地嘅中國人被人擄去KK園區，仲成為電影題材。有幾多個救得返？幾多個仲喺裡面無了期被勞役？我唔知有冇統計，但今次神速拯救到內地男演員王星，就肯定係萬中無一嘅個案。成件事當然係好事，亦全靠王星女友極速高調求救；王星雖然唔係巨星，但佢失蹤嘅消息就被舒淇等其他藝人轉發，短時間內獲得龐大受眾嘅極高關注，無可否認會成為有關部門嘅壓力，呢啲都係王星可以迅速被尋回嘅關鍵。
王星嘅事同時亦引起好多人話自己親人、朋友有同類遭遇，但至今仍然未搵得返。再一次引證，藝人、明星喺天災同罪案等悲劇下，都係會有更高嘅關注度，其實都係一種不公平嘅待遇，而且係不分國籍同地域嘅。
呢種不平等待遇，並唔係藝人自己做出嚟，而係人為嘅，準確啲講，係「人性為」嘅，人性係點，個社會就會點運作。所以，普通人拍拖、分手、出軌都唔關你事，但發生喺藝人身上嘅話，就好似係大家嘅家事咁人人都要知，人人都要評論幾句。而又，一般人攞獎應該開心，但有啲明星攞獎就只會擔心。