3位創作歌手，3位都值得攞金獎。
Ian@MIRROR奪得《叱咤》男金，贏咗大熱Jay Fung。討論咗幾日，唯一結論似乎係大家都唔相信賽果純粹根據播放率，而係同「後台」有關，我冇內幕，純粹理性分析下究竟Ian後台係咩。
局長︰有網民質疑商台為續牌俾個獎Ian。首先商台個牌到2028年先到期，亦剛過咗中期檢討，加上續牌係行會決定，同局長係零關係，質疑毫無根據。
張敬軒︰張生連自己個男金都可以俾Ian，令網民覺得佢會出動人情牌捧Ian拎「雙金」，張生已強烈否認，其實我都覺得佢唔會。我並唔係質疑張生對《叱咤》或樂壇嘅影響力，而係隸屬英皇嘅張生，如果要幫另一間公司嘅歌手爭獎，背後嘅交易複雜到我想像唔到。
Makerville︰公司2024年擺明谷Ian攞獎，全年出5首歌冠絕鏡仔，超高速出埋隻EP，仲要谷埋佢做首個世界巡迴演唱會嘅鏡仔。加上全年係咁上商台宣傳，成個安排的確係想幫Ian攞大獎，而策略亦似乎成功。
「903專業推介」係根據播放次數計算，聽起來好科學，但每年《叱咤》後都總會有一堆質疑，其實播放次數即係由十零廿個DJ嘅行為決定，仲少過立法會議員。推介嘅十大有幾專業就視乎啲DJ有幾專業、播歌嘅準則係乜？係因為首歌好聽？定因為同歌手、宣傳人員關係好？講到尾其實都係人為因素。總結一句，Ian攞咁多獎，係同人有關，唔係科學，就算你話係專業，或者都係「專業嘅人為決定」。
如果頒獎禮都計算播放率，咁今年嘅男金一定係張敬軒，獲得好多人多謝，拍得住林博士及楊博士等老闆級人物。張生「樂壇社工」呢個形象就唔係新鮮事，不過唔係幫人就一定會獲得咁頻密嘅多謝，例如古天樂都做好多好人好事，但獲得嘅感謝就遠不及張生啦，而古生自己都好少提及或講當中細節。有人形容張生「識落注」，專揀有潛質嘅新人，初時幫幫佢，紅咗後槓桿收穫好大。張生究竟係做社工定投資我唔知，我只能肯定佢擁有極度高超公關技巧，樂壇公關佢一定係男金，呢個賽果一定冇人鬧。