Anson Lo開show喊晒，指有人hold住他的演唱會飛，欺負其fans。
Anson Lo同姜濤先後開首次個唱，兩人開騷前都有人喺網上晒大疊飛，仲有報紙娛樂版用「恐慌拋售」來形容，但另一邊廂，大把fans喊晒口話冇飛，猶如平行時空。結果係點？場場爆滿。 而教主就話心痛fans「被唔好嘅人hold住啲飛」，究竟乜嘢人心地唔好？
利申先，我並非神徒，不過信奉善良，當我周圍打聽，就發現恐慌拋售係假，拋售恐慌先真。兩位後生仔首次個唱，唔想佢哋好嘅人，市場分析有三類：競爭對手、眼紅佢嘅人，同埋以上兩者嘅粉絲或所屬嘅公司。
邊個係競爭對手呢？有人同我講，所有20到40歲嘅偶像歌手，總之會接廣告、會唱歌嘅人都係。眼紅佢嘅人又有邊啲？呢個就唔分年齡啦，呢一行有好多人，見到自己喺市場冇以前咁多焦點，就會怪呢一批新星搶咗佢哋飯碗或spotlight；呢班「前輩」有人脈，識記者，有資源，容易成功製造謠言。而市場分析員亦有個觀察，形容呢類「前輩」一般表面上刻意咁經常提攜後輩，塑造一個好好嘅形象，呃到唔少人。反而嗰啲擺明過咗氣嘅「前輩」，係唔會同唔識眼紅呢班新偶像……因為真係唔接地氣，冇留意新嘢。
又有人同我講，呢班競爭對手或者眼紅佢哋嘅人嘅粉絲，或者背後所屬嘅公司，都有機會製造「炒燶」飛嘅情況。《全民造星》同 MIRROR，雖則有人話係為娛樂圈製造咗個小小陽春，但總有人唔會睇到整個市場進步嘅善良一面，只係計較自己嘅偶像藝人分到幾多。而好多人係而家市場有1,000蚊，自己分到200蚊，都會覺得難受過以前個市場得100蚊，自己只分到50蚊，跟住將呢種妒忌轉換成小動作。
以上三類人邊個hold住啲飛我真係唔知，知都唔會開估，我只知世上如果有壞心腸，就會有好心地，與其緝兇，不如聽《大隻佬》講，種當下因。善良生善良呢個真相，真過黃牛網嗰大疊飛。