香港仲需唔需要Chill Club？

Chill Club推介榜年度推介做到第4屆，口號係「人人樂壇，音樂第一」，本身想突破傳統樂壇頒獎禮模式。但今屆睇完網民反應，我覺得唔係好啱數，建議ViuTV明年唔好再懶有型，做返傳統模式算。因為以下呢啲突破，係香港人未需要或永遠唔需要嘅。

1) 開放投票，透明度高。樂壇頒獎禮不時被批評「圍威喂」，公司本身有歌手嘅，就更易被人話益晒「親生仔/女」。Chill Club用行動印證「人人樂壇」，引入投票並公開票數，Nancy Kwai可以贏Marf，有網民更統計過歷屆大贏家係林家謙，MIRROR都只係第三。搞咁多嘢都冇人讚，仲要質疑神徒有十幾萬票，其實大家用同一套規則，邏輯上都係公平，但就始終都會被人鬧。所以我係ViuTV就唔好搞咁多，「圍威喂」起碼自己人開心。

2) 表演為主，促成合作。好多人話Chill Club似音樂會多啲，因為唔只得獎者有得唱，亦唔係唱得獎歌，而係引入好多唔同嘅合作表演，想做到「音樂第一」。早兩年好多香港歌手合作表演都好好睇，不過據聞當時疫情，歌手比較多時間彩排，而家個個只俾到幾個鐘，只能簡簡單單jam下咁彩排。Chill Club今年仲請埋外國歌手來crossover，例如英國歌手Griff，連Taylor Swift都係佢fans。Chill Club有心又抌本，但最終都係被人話悶，又係計錯數，大家只想睇香港歌手唱得獎歌，講煽情感言多啲。

3) 開放平台，集合力量。早年唱片公司同不同傳媒嘅關係，影響歌手得獎機會甚至出唔出席頒獎禮。Chill Club推動嘅係樂壇，需要集合所有人力量先可以發展，俾歌手上去表演，所以大部分歌手都鍾意Chill Club，而年度推介亦一直都比較齊腳出席。不過今年張敬軒無到，攞左幾個大獎，IG亦一句都無提。張生係全港最識PR嘅藝人，一直計算精準，今次提都冇提，已經超出咗唔得閒嚟呢個層次。得唔到「我最喜愛男歌手」嘅喜愛，Chill Club條數又點會計得啱？

「人人樂壇，音樂第一」未必係香港人追求嘅層次，ViuTV嘅初心都只會係多心。